77歲汪明荃（阿姐）將於11月再踏紅館舉行演唱會，阿姐日前表示為今次演唱會，親自邀請林家謙和黃偉文（Wyman）寫了首新歌《Make My Day》，作為個唱結尾歌。
昨晚（14日）Wyman在社交平台分享寫這首歌小故事，並表示要「報28年前的恩」。Wyman表示這首新歌，他是非寫不可：「還有一個連對汪明荃本人我都未講過的理由。如果你有睇Concert YY，你可能會記得我講過，我阿爸阿媽咁多年嚟，其實都好似唔係幾知我係做緊啲乜嘢嘅。
廣告（請繼續閱讀本文）
好記得廿幾卅十年前，有一次我阿媽問我：『你成日閂埋房門寫寫寫，其實你係做乜㗎？』我話：『阿媽我而家做緊填詞人呀。』
阿媽話：『咁你有冇寫過汪明荃？』我話：『未呀。』『咁你應該都係渣渣地，唔係好入流！』佢掉低呢句咁狠毒嘅說話就行開咗，從此之後，再冇問過我一句關於我嘅寫詞工作。
大概喺佢心目中，呢幾十年無論我做過乜，都係唔計數嘅，總之一日未寫到汪阿姐，呢個仔都係流流地、好打有限嘅。所以，好開心好開心，喺入行寫詞超過三十年之後 …阿媽，我終於『入流』啦！」林家謙也回應Wyman：「我阿媽應該都感同身受。」
廣告（請繼續閱讀本文）
（即時娛樂）