林家謙上星期推出今年第一首作品《無答案》，再次包辦曲詞編監，唱出懷舊韻味，以溫柔旋律同聲線安撫人心。
「呼吸之中聽得到脈搏心跳聲 多少晚要給心裡盤問究竟」
夜闌人靜時，我地總會浮起種種思緒，可能係後悔過往既決定，可能係諗緊點樣處理生活既問題，甚至只係幻想各種可能性。腦中充斥「點解會咁？」、「如果以前咁做會唔會好啲？」，彷彿進退不得， 好想搵到一個出口，讓自己安枕。
只可以話都市人實在太習慣隱藏自己心事，生怕向別人表露軟弱不安一面。係要到夜深一人，隔絕所有干擾，先有空間坦誠地面對內心。
「雙眼合上看到了寂寞 張眼望見所失很清楚」
其實因為搵唔到解答而感到無力正常不過，每個人都會經歷，但我地往往不自覺地比依種感覺牽著走。然而，盲目追尋只會變得鑽牛角尖，令自己難受，畢竟人生無可能所有事都喺掌控之內，過去亦已無可改變，可以控制既就只有自己既情緒。
依啲思緒說到底只係一個短暫既念頭，無需要不斷追根究底地審視自己，自尋煩惱。世上好多事並無答案，搵唔到絕對無問題，就讓佢自然地喺腦中飄走。嘗試早點休息，讓內心平靜一下，一覺睡醒或者已經唔再係一回事，船到橋頭自然直，一切都會變好。
有時無答案就係最好答案。
「心有很多個如果 驟變幾多個沒可取的答案 」
不過講就咁講，要做到確實唔容易，所以下次當寂寞來襲，負面情緒喺內心交戰時，不妨用依首《無答案》平復一下，學會處理自己情緒係人生必須面對既課題。
「彷似得到過什麼 在瞬間失去就這般給遺忘 終究可有快樂過」
林家謙既作品實在太適合一個人靜靜地放空欣賞，憂愁富感情既唱腔、輕柔編曲，陪伴我渡過無數個孤單emo晚上，好似終於有人明白自己，係最有效既心靈雞湯。
家謙依兩年嘗試咗不同風格既作品，有唔少涉足人生態度。第一次聽可能覺得平平無奇，但細味歌詞就會發現充滿哲理同共鳴，有種越聽越上癮既魔力，為樂迷喺緊繃既生活中帶嚟一點安慰。
「心空了什麼 感覺再累都不懂為何 躺好再看人來 又往」
《無答案》林家謙
曲 : 林家謙
詞 : 林家謙
編 : 林家謙
監 : 林家謙
「幾百萬個背影中墮落
於那霓虹映中交錯過
找上萬個自欺的寄託
彷似得到過什麼
在瞬間失去就這般給遺忘
終究可有快樂過」
▼Follow hkpopculturelover
Instagram: https://www.instagram.com/hkpopculturelover/