根據Fabrizio Romano嘅報導，白禮頓翼鋒三笘薰(Kaoru Mitoma)因為背傷需要休戰兩至三個月，復出之時已經係季尾，因此領隊迪沙比(Roberto de Zerbi)表示認為三笘薰嘅賽季已經完結收咧。
現年26歲嘅三笘薰今季為白禮頓係各項賽事上陣26場攻入3球6助攻，雖然數據上無上季咁亮麗，但邊路突破同速度依舊具必威脅。三笘薰今季係12月因為腳踝受傷曾經缺陣數場，其後又要代表日本國家隊征戰亞洲盃，直到2月中先歸隊，而其中上星期大炒錫菲聯嘅賽事就係佢今季最後一次球隊上陣。雖然係對錫菲聯嘅賽事，當時對手賀基治因侵犯三笘薰而被判紅牌出場，但迪沙比表示三笘薰係賽前已經有傷。
根據數據，自上季起白禮頓有三笘薰上陣嘅賽事勝率為48%，而無佢嘅時候勝率只有36%，球隊入球數字亦減少至接近一半。目前陣中除左無左三笘薰之外，伊雲費格遜(Evan Ferguson)、韋碧克(Danny Welbeck)、基摩(Billy Gilmour)、韋特文(Joel Veltman)、祖奧柏度(Joao Pedro)、占士米拿(James Milner)、軒斯活特(Jack Hinshelwood)同蘇利馬治(Solly March)全部都因傷未能係聽日對狼隊嘅足總盃賽事上陣，所以球隊目前陷入相當嚴重嘅傷兵潮。
現時三線作戰嘅白禮頓聽日對狼隊或許只能用借將安素法迪(Ansu Fati)打中鋒，以如今有限嘅陣容難以擊敗狼隊，更何況係一週後歐霸盃十六強對住羅馬？最後聯賽方面，白禮頓目前以26場39分排係第7位，同第6位相差5分，餘下賽程有一半賽事要對前列球隊，加上三線作戰，對於來季能否獲得歐戰資格抱有懷疑。
▼Follow 足球港場
Instagram: https://www.instagram.com/footballarena_hk/