姜濤誕｜姜糖逼爆銅鑼灣迎接「姜濤號」 萬人空巷勁震撼

MIRROR成員姜濤今天（30日）25歲生日，「姜濤香港後援會」（後援會）秉承偶像希望承擔更多社會責任，連續第3年與香港電車有限公司（香港電車）合作，安排在姜濤生日當天，為電車免費乘車日，讓市民免費搭電車，同賀姜濤25歲生日。

今早過百姜糖（粉絲暱稱）齊集屈地街電車廠，跟3部印有姜濤靚仔樣的電車車身打卡，打完卡就準備出巡，除了該百幾名姜糖外，其他姜糖未能入電車站，在外圍迎接3部電車，沿途亦有途人影電車車身。

當電車駛近地標「姜濤灣」（銅鑼灣）時，現場一早有大批姜糖等候，造成萬人空巷情况，現場擠得水泄不通，由於正值午飯時間，令銅鑼灣逼上加逼，要由警方在場維持秩序。

不少姜糖見到「姜濤號」駛過時，他們揮手兼大嗌「姜濤生日快樂」，為免阻礙其他市民，警方亦驅散他們免聚集，其間有部分姜糖不肯離去，並改為打游擊派應援物品，包括手撥扇子﹑生日帽﹑姜濤宣傳物品及手幅等，而大批姜糖之後聚集世貿對出空地取應援物品，場面同樣墟冚。

（即時娛樂）