陳健安 自由是拼命追尋

踏入2025年，一個人人提倡「做自己」的年代。不論是興趣、喜好、穿搭或言談，都彷彿越獨特，越招人喜愛；諷刺的是，每當你真的確確實實地「做自己」，卻又總會招人話柄，一時被嘲諷奇形怪狀，一時被指責標奇立異。

陳健安（安仔）最近推出新概念專輯《Project Reject》，用六首歌去討論「拒絕」這回事。想法源自他去年在頒獎台上的一句「唔好死，唔好俾人睇死，爭氣。」。不論是謝絕廢話、抵抗痴戀，還是拒絕臣服，安仔希望大家都能在音樂中得到一份「Reject」的勇氣，大膽封鎖各種喋喋不休閒言閒語，然後繼續繼續，違和但不糾正。

逆線行走的風景

「同人唔一樣係可以㗎，當面對一啲反對聲音嘅時候，唔需要俾佢糾正，唔需要自己糾正自己。」

提起新專輯《Project Reject》，安仔以〈我違和但我不糾正〉這首歌說明這次的創作概念，正如歌詞「我無意解釋 同樣也無意修飾 不想扭盡六壬 印證我價值 不要被既定故事發展修正」，他坦言回顧自己三十多年的人生，其實一直在逆線行走；雖則一直被質疑，但從未想過要丟棄自我，塞進社會的各種既定框架當中。

回望過去，安仔曾於少年時期熱衷踢波，以成為職業足球員為志願，一踢便踢到香港甲組；在這地仍未熟悉花式足球的年代，他投入到與朋友創立香港首支花式足球隊，醉心鑽研；大學修讀護理系，畢業後理應順理成章地成為註冊護士，他卻又決定認真發一次夢，成為全職歌手：「其實我好似一直行喺一啲社會未必覺得正確嘅路，但係我冇俾啲反對說話影響到，然後唔經唔覺，終於走到而家成為歌手，可以唱歌同造歌俾大家聽。」

繼續喊 繼續笑 心跳

2019年，風雨飄搖，經歷過失聲低潮的安仔推出了第一張個人專輯《本原》，在那些難以消化的日子裡，〈重生〉曾經是許多樂迷的心靈慰藉。「喺我最低谷嘅時候，我做咗〈重生〉呢首歌。嗰陣我成日會去公園，坐兩三個鐘，望住啲小朋友爬嚟爬去。我發覺觀察小朋友會有好多啟發，覺得佢哋嗰種好pure嘅力量，對我們呢啲所謂大人嚟講，其實係一個好重要嘅支持。」

「呢幾年大家經歷咗好多唔同嘅事件，好似經濟上返嚟，又可以重新開關等等；但我覺得人心未跟得上經濟復甦嘅速度，個心未開關。大家其實係積住好多情緒，冇一個好好嘅渠道俾佢哋發洩。」

由經歷失聲低潮過後的〈重生〉，疫情籠罩時期的〈未知道〉，整個社會似是可以重新開始的〈繼續繼續〉，直至今天的〈當我們返回現世〉；這四首歌可謂陪伴樂迷一同經歷數年間的種種情緒。在一起哀哭過也祝福過以後，在繼續尋找繼續浮游以後，安仔以〈當我們返回現世〉一曲，提醒大家要拒絕沉溺於那個一直尋求安慰的非常時期裡，要相信自己擁有「醒過來」，回到現實世界的能力：「要醒，繼續搏命去追尋自己鍾意嘅嘢，咁樣先係一個我認為真正自由嘅狀態。」

從每首歌曲裡得著力量

不少樂迷形容安仔的音樂自帶療癒、正能量的感覺；在這個對「正能量」總帶點戒心的世代，安仔是如何看待這些貼在自己身上的標籤？

「其實所有歌曲都有療癒效果，無論係慘情歌、好rock，定充滿怒氣嘅歌，只要勾起到你某一種情緒，只要產生到共鳴，你覺得感動，釋放到某一種情緒同感受，咁其實就係我自己定義嘅療癒⋯⋯正能量其實係一個結果，而唔一定係指某一種曲風。你要識得去釋放各種情緒，平衡到成個人。」

問到安仔會否期望自己的音樂創作能為自身和樂迷帶來某種力量，他立即拿起手機，笑說早為回答這條問題而打好草稿：「就住呢條問題，我有深深思考過（笑）。第一點，平衡自我情緒；第二點，釋放感受；第三點，創造選擇；第四點，刺激思考。想唔想我逐一解釋俾大家聽？」他的反應看似鬼馬，但實質卻滿載他對音樂的滿滿想法與熱愛。

安仔直言作為一個創作者，必定需要先對那個題目感興趣，或是「有感覺」，才會著手去寫歌；在作曲時他會感覺到很多情緒，在有笑有淚間，便可「平衡自身情緒」。然後，當安仔完成作品，把音樂分享給大家時，他則期待觀眾也能借曲詞「釋放感受」。此外，安仔亦希望能透過歌曲「創造選擇」：「就好似〈我違和但我不糾正〉嘅MV裡面，我搵咗六個一直逆線行走嘅單位。走自己嘅路，可能會好孤單，可能會好辛苦，但就好似呢首歌嘅英文名一樣，It's okay to be different，我們唔需要因為少選擇而感到焦慮。我希望可以創造更多選擇。」

談至最後一點，「刺激思考」，安仔回想自己過往的創作，其實一直都不是交出「解答」，倒是拋出一題又一題問題，讓自己與樂迷一同思考，用心探視自身當刻的想法或心態。

一路有陌路人 陪你這一生

「廣東歌係由細陪住我大，特別係偶像陳奕迅，佢所有歌都俾咗好多力量我，好容易令我感動。佢啟發咗我好多，無論係歌曲定行為，都好受佢影響⋯⋯如果唔係陳奕迅，我都唔會唱歌，唔會做音樂。」

安仔自小聽廣東歌長大，亦早在大學時期便已加入樂壇，他坦言當年由樂迷轉變成參與者、創作者，再一做便做了十多年，這種身份轉變確實有趣。對比當年剛入行，安仔認為現時的香港樂壇，在歌曲題材、語言及曲風上，也變得更百花齊放。另外，不論是主流樂壇還是地下音樂，兩者亦陸續出現更多有個性的歌手，不同背景的歌手之間亦有更多合作機會，這使身處其中的他感到更好玩，更慶幸能成為廣東樂壇的一分子。

安仔回想當時正在籌備第一張專輯《本原》，看過一本講述「李小龍的武術哲學」的書，裡面談及「成長其實就是要不斷丟棄」，這句話自從便打進他內心，直至現在：「丟棄係去到某個階段，就需要做嘅練習，你喺丟棄嘅過程裡面會發現咩先係最重要⋯⋯你丟棄，就會有空間，就會有啲新嘅嘢入嚟。你會發現當下你最重要嘅係啲咩，所以「丟棄」同「得到」，我覺得係一個不斷循環，去令你個人成長嘅過程。」

廣東樂壇隨時代成長，變得更燦爛好玩，固然是一大美事；至於對於安仔自身而言，來到推出第四張個人專輯的這個時刻，他亦認為自己創作過的每一首歌，其實也是同樣在印證著自己的想法轉變，紀錄著每個階段要面對的成長難題。

期待大家在迷惘又充滿期盼的成長歷程裡，也能取得足夠的勇氣，拼命追尋，不致被世代氣候瓦解本性。

▼Follow 18/22
Instagram: https://www.instagram.com/1822hk/
Website: https://www.18-22.com.hk/
YouTube: https://www.youtube.com/@1822hk