拍過咁多跑會，被問得最多嘅一定係邊個跑會最好。
但點先為之一個好嘅跑會 ? 令你跑快啲 ? program 夠啃 ? 教練有料到 ? 相信每個人心中都有一把尺。
「Altra Run Club」主教練 Jason 片中多次強調，嚟到呢度並唔需要將自己推至最盡，亦無需要辛苦，只希望每位學員能毫無壓力且舒服地享受每星期一次嘅訓練。
訓練可以唔辛苦 ? 有啲咁嘅事 ?
Jason 教練個子並不高大，皮膚黝黑，典型 elite 跑手身型，即係得棚骨嗰隻，但話說語調堅定兩眼有火，從佢口中所講嘅一字一句感覺都經過深思熟慮，堅定不移。好喜歡片中佢所講嘅呢返說話 ~「我唔係要每個嚟到嘅人辛苦，單係辛苦是沒意思的，重點係每個人因應自己嘅能力去發揮自己。」意思接近量力而為，但又不只於此，有啲嘢…..
有趣嘅係，「Altra Run Club」嘅學員並無因此而乘機 hea 跑輕鬆跑，反而更認真更落力去完成當日嘅功課，而且都係面帶笑容樂在其中的，每次均跑到面容扭曲嘅我不得不修正一下表情管理，尤其呢度唔主張過於辛苦嘅訓練。
更令人反思嘅係，作為跑會教練除咗教導有方，自己有料外還需具備啲咩呢 ?
Jason 教練提到，而以往較少從其它教練口中所聽到嘅「同理心」，「Altra Run Club」是有點不一樣。優秀嘅學生固然耀眼，稍遜嘅學員似乎更應獲得關注。坦承性格內儉嘅 Jason 教練為此而作出改變，先打開自己再藉此了解學生幫助學生。勇於承認自身不足，修正自我再推己及人，如此自省嘅一位教練，難怪每位學員都笑住嚟笑住跑笑住走。
話說自己花了超過一年時間苦練 sub 3，甚麼 interval、tempo、LSD，甚至通勤跑收工跑，從不揸流灘不間斷，如此這般，點會唔辛苦，但最終還是只差一點點，點可能沒一點失落 ? 到底係唔夠辛苦還是辛苦過頭 ?
Altra 跑鞋向以 zero drop 為賣點，鞋頭鞋踭近乎零嘅落差，以提供跑手們更能全面感觸路面，反之，人生又點會全無起跌 zero drop ?! 感謝 Jason 教練嘅一席話，明白到重點係學懂如何面對自己，找出真正屬於自己嘅路，縱使落差再大也能坦然面對，sub 3 只是一個時間甚或跑手們某一階段嘅中期業績報告，比起生命中所要學要追求嘅，2’59’59” 算係啲咩 ?!
The post 尋找跑會的故事 #34 | Altra Run Club 人生怎會 zero drop ?! appeared first on Fitz 運動平台.