見到台灣方面會派代表隊去作客泰國打番場友誼賽，就覺得有乜理由我地香港隊近排一場友誼賽都無安排到。反正你十二月適逢世界盃，本地賽程又大部分都係安排埋啲盃賽賽事，上嗰禮拜入場人數連五百都無呀陰功。趁人地咁啱東南亞盃就黎開鑼，趁人地都要全力練兵之時，其實就係我地加緊備戰亞洲盃嘅時機。咁難得闖入亞洲盃決賽週，真係希望足總事前準備功夫可以加多兩錢肉緊。喺台灣無乜目標都走去泰國集訓嘅時候，我地香港隊N年黎第一次打亞洲盃決賽週究竟有乜資格躺平呢？
好，可能有人會反駁話而家中超仲打梗，中國球會又唔會放人俾你打場友誼賽，唔齊人練黎無咩意思。只但係我哋香港隊而家外流兵會拎到正選位應該就得茹子楠、梁諾恆、陳俊樂同埋安永佳，另外嗰七個位都應該係本地聯賽效力，包括葉鴻輝、羅梓駿、胡晉銘同孫銘謙呢班實力戰將。有呢班球員夾多幾場，隨時可以提升到中前場默契，喺正賽嗰陣有唔少幫助。再講呀，港超今屆存在深水埗同香港U23呢啲實力非常一般嘅球隊，整體比賽水平大大減低，呢班港腳都好需要要有多啲高水平比賽去維持戰鬥力。
廣告（請繼續閱讀本文）
最重要嘅係而家約戰東南亞球隊，佢哋為咗備戰一定唔會揸流灘，對港隊黎講一定有練兵作用。就算約唔到越南同泰國兩支東南亞勁旅，約吓印尼、新加玻或者菲律賓呢啲同港隊實力相弱嘅球隊，都會比到個機會安達臣去嘗試解決問題，同時間令球員再進一步去了解同適應安達臣戰術思想。話哂安達臣呢種比較進取嘅戰術，對球員黎講可能仲係比較新，喺對印度、南韓同中國呢啲球隊transition 都出哂事，實在有必要去攞多啲實戰經驗去改善。家陣乜鬼友誼賽都無安排，都咪話唔失望。
▼ Follow 守拙頻道
廣告（請繼續閱讀本文）