股價跌殘大企唔Buy Back 箇中因由耐人尋味

筆者從事證券買賣數十年，歷經不少股壇風浪，但罕見現下香港股市的怪現象。今時今日港股的頹唐不振已經破晒記錄。前兩日有人謔稱台灣加權指數已經超越恒生指數，是30年來首次。其實將加權指數同恒生指數比較就等於將提子乾同香印葡萄比較一樣，根本無得比，反而同新加坡海峽時報指數比較仲有啲譜。

曾幾何時，恒生指數同新加坡海峽時報指數是一比一，即係恒生指數1,000點時，海峽時報指數亦差唔多，大家叮噹馬頭。但隨住香港經濟迅猛發展，雙方大大咁拉開距離，香港更曾經超越新加坡十倍以上。然而近年唔知點解，香港同新加坡的距離又拉近到只有五倍上下。以昨日恒生指數收市報16,993點為例，新加坡海峽時報昨日就收報3,084點，香港高出新加坡五倍多少少，再咁落去，隨時返番去以前個年代，大家一比一打個和。

依家個市肯定係超賣，凡係出現此現象，若是過去一定有本地大型上市公司會buy back，但今時今日就非常奇怪，竟然少見有大型企業出嚟回購，好似睇住自家股票畀人質低都唔還手，到底係何原因呢？真係有啲耐人尋味。莫非大家繼續唔睇好後市？真係百思不得其解！

講到回購，今年確有一啲上市公司回購股票。根據設於上海的金融數據和分析工具服務商Wind的統計數據顯示，今年以來共有190家公司實施回購，回購數量超過74.35億股，回購金額達1,027.83億港元，同比增長16%，主要係啲內地企業或者係本地中小型上市公司。至於本地富豪級擁有的上市公司就未見有太大動作。

睇番啲數據，2021年全年港股公司回購金額達381億港元，2022年全年港股公司回購金額達1,049億港元。港股公司回購股份存在多種原因，包括向股東返還現金、調整股本負債比率、增加每股盈利或其他以已發行股份數目為基礎計算的指標、方便股東退出公司、或向市場發出其股份被低估的訊號等等。

講完股市講下樓。新地推出天水圍全新盤YOHO WEST連日來掀起收票熱潮，雖然該盤今日才截票，但坊間估計會超額認購42倍以上，成為近期成功賣樓的一個指標。天水圍樓價係香港升幅最大的地區。想當日天水圍樓價不過千幾蚊一呎，即使本地樓價飆升，最後一浸至會輪到元朗地區，照現時YOHO WEST的銷情來看，加上政府北部都會區計劃，天水圍樓可以睇高一線，值得留意。

=============

延伸閱讀：【吳老闆筆記】投資環境生變 慎防稅收現骨牌效應

=============

深入閱讀政經生活文化，更多內容盡在：

Website：www.capital-hk.com

Facebook：www.facebook.com/CapitalPlatformHK

Instagram：www.instagram.com/capital.ceo.entrepreneur

LinkedIn：www.linkedin.com/company/capitalhk/