「祈求民主與自由 萬世都不朽～」
之前有講過，除咗走上前線示威之外，網上文宣都一樣有好大力量，除咗可以號召更多人支持呢次運動之外，好多網友發起嘅行動都成功引起外國關注介入事件，從而俾到一D壓力政府。反送中示威者成日話要Be Water，所謂滴水穿石，一個人做到嘅嘢可能好少，但當大家團結一致為民主發聲，其實就係一股好強大嘅力量。以下呢五件事可以話鋪墊咗呢次929全球抗極權遊行，DailyView用網路大數據帶大家睇吓邊件最令你印象深刻！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
image source：《KEYPO大數據關鍵引擎》，搜尋主題：「929」，搜尋區間：2019/8/29-2019/9/28
929台港大遊行
每次講到政治問題，大家都聽唔少「今日香港，明日台灣」呢個口號，今次反送中運動都幾多台灣人好關心㗎，喺好多新聞下面嘅留言都可以見到有唔少台灣網友支持香港。早前有接近一百個民間團體，包括台灣青年民主協會、台灣公民陣線等等，發起咗「929台港大遊行—撐港反極權」，9月12號何韻詩同台灣樂團滅火器主唱——楊大正仲一齊出嚟呼籲大家支持。
image source:
願榮光歸香港
連登網友改歌有一手就大家都知，今次反送中運動當然有唔少改編歌，最近大家唱最多可能係「呀～死黑警～」。不過其實有一首十分高質喺原創歌，被譽為香港之歌，呢首就係由一般網民共同創作嘅「願榮光歸香港」，除咗有管絃樂團同合唱團翻唱「專業版」，更被翻譯成幾種語言，而9月24號原作者 Thomas dgx yhl 就正式發佈英文版，希望同外國we connect。
image source:
全球連線
9月25號香港民間記者會發佈全球行動預告片，宣布經過一個月籌備，今次有24個國家，65個城市響應同步進行呢個大遊行，希望達到「全球連線，對抗極權」，呼籲所有自由國家可以企出嚟，同香港一齊抗衡中共極權。當中加拿大同美國分別有10個城市參與，另外仲有英國、澳洲、日本版、台灣、義大利、瑞士等等嘅地方都有份參與呢個全球連線示威，聲援香港人。
image source:Facebook/全球集氣反送中
我要攬炒
警方默默關注連登上面發佈嘅最新動向，當中連登仔「我要攬炒」係其中一位比較為人熟悉嘅會員，而佢嘅帖文最少都有7000個正評！喺6月10號第一次出post號召連登仔，第二日就寄信去英國、美國等等地方要求禠奪建制派同政府官員現有外國護照，甚至凍結外地資產。之後「攬炒巴」陸續有發起多次行動，包括向寫信俾聯合國同國際特赦組織希望佢地關注、介入警察濫暴行為。
image source:LIHKG
香港怎麼了
香港邊城青年係由一班在台港人組織而成，就算身在台灣無辦法走上前線，都希望可以為香港出一分力，除咗用文宣向台灣人講解香港發生緊嘅事，早前都有協助處理收集頭盔。喺佢哋Facebook可以見到「香港怎麼了」系列嘅文宣圖，就係希望用一張張文宣圖，同精簡文字向台灣一D未必好了解香港目前情況嘅人解釋。
image source:Facebook/香港邊城青年
身在海外心在港 世界各地反送中行動
反送中運動進行到宜家已經步向第四個月，不過一班示威者仍然堅定不移繼續大嗌「五大訴求，缺一不可」嘅口號。長時間抗爭並無動搖大家嘅決心。事件演變至今，已經唔單止係中國同香港之間嘅矛盾，唔少外國官員都有關注今次反送中運動。美國總統川普警告中國唔好動用暴力鎮壓；英國外交大臣提到反送中事件，警告中國唔好壓制香港民主，否則有嚴重後果；日本總理安倍晉三向習近平強調「一國兩制」重要性；台灣總統蔡英文表示支持香港人追求民主自由。除咗以上國家，其實仲有好多國家有聲援香港反送中嘅活動，一齊用《KEYPO大數據關鍵引擎》睇吓以下呢五個國家因為反送中而發生過咩事：
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
image source：《KEYPO大數據關鍵引擎》，搜尋區間：2019/6/8-2019/9/28
在台陸生撕紙動口又動手
香港連儂牆成為大家喺抗爭活動中嘅一幅幅美好風景，除咗感到各位手足嘅溫暖之外，都係激勵大家士氣嘅一個渠道，而台灣有多達20間大學都有意喺校內設立連儂牆。而好多間大學校內都有發生陸生港生衝突事件，包括東吳、義守，文化同世新大學，衝突原因大部份都係因為有香港留學生貼出反送中文宣，而導致中國陸生不滿而引起。
image source:
日本撐香港重新掛起被拆許願牌
反送中運動一直蔓延，有香港人去到日本大阪旅行都不忘心繫香港，喺神社許願牌上寫上「五大訴求，缺一不可」同「香港人加油」等等嘅打氣說話，有一位擁有13萬粉絲嘅中國網美去到呢個神社見到呢兩塊許願牌火都嚟咁話，仲將許願牌拆落黎埋喺泥土入面。佢事後喺微博表示自己支持香港警察，話自己係小天使，唔可以俾人講佢「大中國」壞話。呢件事引起日本網民炮轟話佢冒犯神明，仲有好心人將呢兩個許願牌重新掛返上去。
image source:
多倫多富二代跑車炫富挑釁
每次喺外國舉辦嘅多個聲援香港「反送中」遊行幾乎都有親中人士嚟踩場，同集會人士互鬧。喺8月17號多倫多遊行，有十幾架插住中國國旗嘅跑車「踩空波」試圖刺激氣氛，現場親中嘅紅衣人就吶喊助威，完全係要打壓在場著黑衫聲援反送中嘅海外示威者。有參與示威嘅移民港人就話雖然係咁，不過呢D示威行動都凝聚咗唔少身在海外但仍然好關心香港嘅人。
image source:
墨爾本撐港派親中派衝突
8月16號，墨爾本維多利亞州州立圖書館有集會聲援香港反送集會中，有撐中人士踩場，手上舉住「我支持香港警察，你可以打我了」嘅標語同中國五星國旗，呼叫口號，更加突然穿越示威者，同示威者有推撞，干擾本身進行緊嘅反送中集會。有澳洲廣播公司法記者被親中男子推開，一名香港女性被親中人士推撞同拉扯頭髮，後來警察強行介入，先可以分開兩邊人馬。
image source:
智利台商撐港被騷擾
喺智利首都聖地牙哥有一間由台灣人開設嘅餐廳，老闆因為表態支持香港民主運動，而引起喺當地嘅中國人不滿，去到佢間餐廳搞事。除咗喺餐廳入面掛起中國國旗，唱國歌之外，更疑似喺餐廳門口隨處小便同塗鴉。呢件事事後被CNN等媒體報導，台灣外交部發言人證實事件之後就表示強烈譴責中國人嘅暴力行為，並會向呢一名台商提供相關協助。
image source:
分析說明：
本研究資料由《KEYPO大數據關鍵引擎》提供，分析時間範圍為2019年08月29日至2019年09月28日、2019年6月8日至2019年09月28日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『9.29全球連線、全球反送中地區』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。