疫症打撃各行各業，不少小店都想盡辦法自救。位於旺角的「阿木台灣麵」除要面對限聚令、堂食限制等防疫措施，佢哋嘅舖位仲不時停電，影響經營。為咗幫補下，台灣籍老闆娘就諗到引入多款台灣地道雜貨，仲將店內自家製醃菜、醬料出售，讓大家帶返屋企慢慢嘆。產品除咗可以去店舖選購，亦可網購，不過到底產品吸唔吸引？CONY帶咗大部分產品返屋企實試，睇下有咩推介！
大推招牌麻辣醬 鹹鮮而辣勁有層次
先睇睇自家產品系列。由於老闆娘係台灣人，而且家中開設牛肉麵店，佢嫁嚟香港之後因為想傳承外婆及父母嘅手藝，毅然同丈夫開設呢間台灣麵店，而店內大部分食品都係自家製，誠意十足。
今次店內推出嘅自家製產品，包括有手工麻辣醬、4款台灣醃菜，包括菜脯、台式泡菜、蘿蔔條及酸甜小黃瓜，以及水蜜桃烏龍冷泡茶包。當中大推手工麻辣醬，佢加入蝦米炒製，因此有種獨特鹹鮮，食落會辣勁漸強，最後麻味滲出，好有層次。據知配方係來自老闆娘嘅媽媽，不加任何化學劑，採用純天然食材，而且係每日人手炒完再入樽，因此數量有限，唔想摸門釘就記得預訂。
至於台式醃菜方面，佢哋嘅菜脯同CONY食開嘅潮州菜脯唔同，切成粒狀嘅菜脯加入豆豉醃製，不帶辣勁，而且比較乾身，食起上嚟爽口又帶豆豉鹹香。而白蘿蔔係CONY最愛嘅醃菜之一，呢度出品都係基本嘢，爽口帶酸勁，不過吞落口時啲醋有少少辣喉，美中不足。最後，水蜜桃烏龍茶包係自家調配，適合做冷泡茶。佢嘅烏龍茶醇香，帶陣陣水蜜桃嘅清甜，鍾意飲台式水果茶嘅朋友應該會幾鍾意。
自煮台式風味家常菜
除了自家出品，小店又引入多款台灣地道又家常嘅雜貨，如醬料、罐頭、即食食品等，大部分都係台灣製造，大家儲糧有更多選擇。而且如果你係嗰種去旅行鍾意行超市買當地產品返屋企試嘅朋友，呢度嘅產品或能幫你哋止一止旅行心癮（唔擔保會係更掛住旅行時光㗎）。
除咗以上糧油雜貨，餐廳又引入多款台灣製造嘅飲品。首推坊間少見嘅「貝納頌咖啡」，佢採用國際咖啡評鑑權威「Coffee Review」評為卓越級嘅咖啡豆配方，味道唔會好甜，而且有種炭火焙煎嘅香味，罐裝咖啡嚟講算係高質。另外又點少得台灣最為人熟悉嘅汽水「蘋果西打」，仲有仙草蜜、麥香紅茶、芭樂汁等深受當地人喜愛嘅經典飲品。
總括而言，小店嘅產品一定唔夠其他雜貨店咁齊全，不過就幫你精選咗好多台灣製造嘅地道產品，加上自家製作嘅產品質素不俗。不過溫馨提示，以上產品雖然話喺店舖有售，不過佢哋始終係餐廳，選購空間唔多，亦未必齊貨，所以都建議大家網購，免得專程去又買唔到心儀產品啦。
阿木台灣麵
地址：旺角廣華街8號號地舖
電話：2311 9922
訂購網址
備註：運費到付
