反送中爆紅十大記者！立場姐姐居然只係得第三名？

社會良心，見證事實

記者，係社會監察嘅良心角色，無咗佢哋出生入死，流下無數血汗嘅報道，好多社會公義都唔能夠揭露於世。香港自6月「反送中」逃犯條例修訂至今，社會幾經動盪，「和理非」三次百萬人遊行集會，「勇武」多次衝擊，甚至短暫進佔立法會，警方不斷開槍驅散、攻擊示威者，7月21號之後多單黑社會無差別襲擊示威者，仲有好多好多事發生咗。而咁多次，香港都有一班相當厲害、專業嘅記者朋友，冒住生命危險採訪、直播，只為咗畀讀者第一手嘅真相。「無大台」嘅抗爭，有評論指抗爭者將情感轉移落記者身上，正因為咁，今次運動之中有許多記者受到網路熱議，構成咗抗爭運動重要嘅一環。今日，就等DailyView用網路大數據話你知，網民講得最多嘅記者同事件到係咩喇！

DV小教室：網路溫度計透過《KEYPO大數據關鍵引擎》大調查觀測咗近萬個網站頻道（而且不斷增加ing），包括港澳地區的新聞頻道、FB、IG同埋各大討論區、Blog……透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。

張家灝（3660筆）

——祝前程似錦

香港傳媒大台TVB，喺今次「反送中」引起嘅社會抗爭運動入面，報道受到反送中網民質疑，都唔太鍾意佢哋嘅採訪。TVB前線記者張家灝，喺8月11號銅鑼灣發生嘅警民衝突，佢好主動咁追問黑衣人嘅身份，令好多網民都激讚佢係記者良心。又點樣會諗到喺幾日之後，負責呢次採訪嘅記者張家灝就畀咗TVB一封辭職信，正式決定離開TVB，舉動再掀起網民議論，對張家灝嘅離職有各種唔同猜測。

image source:FB／ 張家灝粉絲頁

黃浩賢（1169筆）

——全港最靚仔嘅記者

有線新聞台記者黃浩賢，一向因為佢白淨斯文嘅外表，廣受網民關注，甚至被封為「新聞部男神」。而黃浩賢喺香港「反送中」6月9號首次大型遊行之中，都有去到前線採訪，喺當日晚上發生流血衝突，連記者都受到警方武力對待。之後有報道講黃生之後喺個人IG story post咗張圖痛罵警察，「成晚我只見到一班爛仔」。佢之後又另一個Post話唔需要神化記者，都係做份內事。咁謙，難怪網民咁支持喇！

image source:YouTube／HK News Archive 香港新聞檔案室截圖

蘆儀（387筆）

——唔該請你尊重我

TVB記者，同張家灝辭職唔一樣，蘆儀選擇繼續留喺TVB工作。好多反送中網民唔太鍾意TVB嘅報道手法，自然都會燒埋前線記者，蘆儀就俾好多網民批評喇。其中，因為TVB記者喺抗爭現場訪問時無放TVB logo，俾網民話佢哋隱藏身份，唔放記者證好怪。蘆儀喺FB留言就解釋，話因為示威者會對佢哋有威脅，所以先唔show。佢亦都話，自己已經好盡力，希望大家唔會抺殺佢哋嘅努力，唔會盲目批評。

image source:FB／新聞女郎

Anna Coren（161筆）

——CNN記者都發火

喺7月27號，香港人發起「727光復元朗」遊行，其間發生激烈嘅警民衝突，警方發射多發嘅催淚彈驅散示威者，仲衝埋入西鐵站打人。外國媒體CNN記者Anna Coren，佢形容今次警方嘅行為係「瘋狂」（Madness）、「混亂」（Chaos）同「暴力且不必要嘅無紀律行為」（Mayhem），而示威者反而係「和平」（Peaceful）。好多網民都話自己睇到好憤怒！

image source:

何曼筠（117筆）

——不畏強權發問

元朗黑夜，7月21號，係香港6月「反送中」社運至今嘅重要時刻，尤其係各界片段都有證據指出，當天係警察同黑社會嘅合作。7月23號，警方開咗記者招待會回應721事件，據《香港01》報道，TVB記者何曼筠就質問現任特首：「頭先一開頭譴責中聯辦行動後先講元朗襲擊，係咪覺得塗鴉國徽緊要過元朗人身安全？另外你會唔會定性元朗事件為暴動？」問哂香港人想問嘅問題，唔怪得網民強讚嘅。

image source:

熱門網路新聞平台

根據《KEYPO大數據關鍵引擎》，我哋會見到6月8號至8月19號「新聞採訪」傳播趨勢嘅概念圖，發現香港電台同立場新聞兩個本地媒體，喺最為受到網民留意、熱議嘅平台。佢哋嘅新聞採訪咁受歡迎，自然都會有好多人留意佢哋嘅記者喇。今時今日，仲有邊個唔識下面呢五位記者朋友喎！

利君雅（69612筆）

——人人都可以係佢

今時今日，香港人睇政府部門開記者招待會嘅其中一個原因，係為咗聽香港電台記者利君雅嘅發問。原因無他嘅，佢勇敢、強捍同一針見血嘅問題，為好多香港市民發聲，甚至因為咁被封為女神。要數最經典嘅，係721元朗黑夜之後，利君雅喺7月23號嘅記者招待會連珠發問，「點解今朝先知嘅，尋晚瞓唔瞓得著覺？特首你仲未回答我嘅問題」，好多網民支持利君雅為香港人發聲，認為佢相當熱愛香港。

image source:

陳裕匡（33348筆）

——立場手指哥哥

立場新間記者陳裕匡，又有好多個外號，包括因為成日喺直播鏡頭前比手勢，網民戲稱佢做「手指哥哥」。佢又有另一個朵，因為佢成日自備冰包冷卻發熱嘅直播手機，網民又封佢做「冰鎮哥哥」。網民會叫咁多咁親切嘅名，係因為陳裕匡喺最近香港社會運動入面，東跑西奔咁直播，而佢嘅風格又唔同傳統媒體，相當幽默風趣，令好多網民都勁鍾意睇佢直播。仲有網民叫佢自己開台吹水，唔知有冇機呢？

image source:

何桂藍（21094筆）

——人靚心善立場姐姐

立場新聞記者何桂藍，網民成日力讚佢人靚，份心地又好，幫佢起咗個花名叫做「立場姐姐」，相當親切。其實以上咁多嘅愛，都係出於網民欣賞佢直播嘅表現，不辭勞苦，甚至生命安危咁為香港人報道真相。最備受關注，亦都令一眾網民相當心痛嘅，當然係何桂藍喺7月21號晚喺朗屏地鐵站，俾成堆白衫人毆打受傷嘅直播喇！網民睇住直播，嬲之餘自然更加支持立場姐姐報道真相，話香港最需要佢呢種記者！

image source:

陳朗昇（9552筆）

——立場昇哥

人稱昇哥嘅立場記者陳朗昇，佢成日喺今次香港「反送中」社會運動入面，走喺前線，成日都直播現場情況。好多網民都話會特登入去睇佢嘅直播，皆因昇哥學識淵博，對警察事務、裝備如數家珍，而且講嘢其間又不時夾雜歷史掌故，相當高質。畢竟直播期間，並唔係時時刻刻都有事情發生，網民嘅注意力好易分散咗做其他事，有突發事情又睇唔到真相，有呢種咁有吸引力嘅記者，先可以令更多人留意現場情況。

image source:FB／香港記者協會 Hong Kong Journalists Association

林彥邦（2607筆）

——保持中立真記者

林彥邦係立場新聞嘅記者，佢充份體現咗記者嘅中立性，不論警察定係市民，只要係佢覺得唔正確，有阻記者行使第四權嘅話，都會出聲。好似之前有抗爭者話要阻止TVB記者採訪，佢就出咗篇文，希望唔好傷害記者，唔好阻記者採訪，因為記者嘅天職係講事實，無論邊一方有問題，都要報道。網民見到就力撐佢，話咁樣做先係保持中立嘅記者，香港需要更多堅持講真相嘅人，感謝林彥邦！

image source:FB／ 林彥邦

分析說明：

本研究資料由《KEYPO大數據關鍵引擎》提供，分析時間範圍為2019年06月08日至2019年08月19日。

網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『反送中十大記者』相關文本進行分析，並根據網友就該議題之討論，作為本分析依據。

本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。