容祖兒演唱會劉德華出場 初戀第一次入紅館睇佢「冇打車輪」

繼古天樂之後，容祖兒Pretty Crazy演唱會第12場嘉賓依然份量好夠，就係劉德華啦。Joey唱〈謝謝你的愛〉介紹劉德華出場：「今晚呢，呢個一點不簡單，我稱不上同佢好好朋友，因為佢係我心目中係遙不可及，早已超越了偶像，係我學習傍樣。總之佢叫我行東我不會行南，佢叫我坐我不會企！」

劉德華一上台，Joey就飛撲攬到實，劉德華就話：「我好少抱啲咁後生嘅細路女。」祖兒問：「點解你咁靚仔？」華仔又答，「我天生。好多時都同人講，唱歌跳舞可以勤力去練，但係靚仔真係冇得練。」之後Joey仲伸手摸華仔塊臉，至於點解請佢做嘉賓，Joey就答：「我想話你知，我第一次入紅館睇演唱會，就係睇你《夏日fiesta演唱會》，同我個初戀。」「哦，當年我見到個嘴唇厚厚，同個男仔係到唔知做乜個個……」Joey即答：「冇呀，當年冇打車輪架，最多拖下手仔咋。」

之後劉德華還說：「04年我地一齊攞過一次大獎。我本來希望14又可以一齊攞，我13年已經開始準備，不過嗰年好忙，因為我好色。搞咗個小龍女出來。所以2024年啦！再一齊拿獎，你唔駛等我，我趕緊上來啦！另外，我個女話，你來睇我演唱會，由頭跳到落尾冇停，你其實不止開18場，可以開夠28、38啦。」Joey就話：「你個女好得意呀，搵次比我去探下佢啦。」劉德華就話好：「不過唱歌先。」