由荷李活永遠男神奇洛里維斯主演嘅《 John Wick 》全球大收，續集拍完一集又一集，成為殺手片系列經典之作……咩話？無綫都話要跟風？仲搵咗陳豪同黎耀祥扮港版「 John Wick 」，落實會緊接《 飛虎之雷霆極戰 》後播出㖭！
撰文、圖片：東方新地
陳豪黎耀祥鬥chok扮殺手
廣告（請繼續閱讀本文）
呢套港版《 John Wick 》名叫《 殺手 》，日前預告片率先見街，證實所謂港版《 John Wick 》只不過都係以職業殺手做背景，而故事橋段完全唔同！套劇換個角度講吓地下社會、職業殺手與清道夫、殺手中介等等相關行業運作架構，並以黑色幽默手法去帶出救贖嘅重要訊息。由如日中天嘅神級殺手喬星（陳豪飾），以及風光不再嘅潦倒過氣殺手閻武（黎耀祥飾）作為故事骨幹，兩大視帝鬥 chok 鬥演技！
廣告（請繼續閱讀本文）
廣告（請繼續閱讀本文）
李佳芯雪足年半終重見天日
話說回頭《殺手》其實早喺2018年開鏡拜神，登上2019年電視台月曆仲要係去年節目巡禮重頭推介劇集，點知拖到2020年都過咗一半至出街，話晒兩大視帝攜手演出嘅重頭劇竟淪為倉底貨，因由何在？咪就係因為女主角李佳芯（Ali）去年喺微博失言慘被無綫雪藏，結果導致《 BB大晒》、《白色強人2 》等都被易角，連完成咗嘅台慶劇都冇得出街！見攤足年半、Ali守行為年半，無綫終於肯放套劇重出生天，除咗為清倉，主要都係想試水溫睇吓兩地觀眾對李佳芯嘅反應。想快啲睇到360度無死角李佳芯復工繼續有劇拍嘅，大家就要識做捧場啦！
https://www.youtube.com/watch?v=q9NFyDFIYes
Tim 我好欣賞陳豪同黎黎耀祥嘅演出，都好喜歡Ali，但係東方新地嘅稿就真係不能容忍，大佬，你都唔好同人地個種級數去比較啦，我眼都凸，港版John Wick？？東方就係跟咗大陸個套，吹水就天下無敵！
2020年06月04日04:47
顯示全部