文青十大技能？做齊先算真文青！
「文青」原本係指熱愛藝術嘅文藝青年，不過後來演變成一班唔跟主流，望落飽讀詩書，好有文學氣息嘅一班人。近呢幾年文青派由少數逐漸變多，文青呢個名詞都已經變成形容詞，成日聽到人地話呢個景點、邊個著衫好文青。但呢班人入面有幾多係真文青，幾多係偽文青？今日DailyView根據《KEYPO大數據關鍵引擎》列出呢十大文青必備技能，睇吓到底點樣先算一個稱職嘅文青！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
10 菲林底片仲多過手機入面嘅相
自從數碼相機面世，影相變得更普及，依家一部手機已經可以影出好高質嘅相，不過文青點會滿足。當大家都用手機影相，偏偏就要同人地唔同，時光倒流去返以前嘅底片時代，用菲林相機紀錄每一個影唔返第二張嘅時刻。比起數位化攝影嘅精緻，菲林相機出嚟嘅效果更加令人感受到溫度，難怪文青對菲林相機愛不釋手。
image source:unsplash
9 不會錯過任何參觀古蹟的機會
好多古蹟經過翻新之後都成為打卡熱點，唔少古蹟都免費參觀，花一日時間行吓感受歷史氣息，再影吓相都係唔錯嘅選擇。香港平時生活節奏咁衝忙，鬧市中可以保留呢D歷史遺跡，真係要好好珍惜。平時去旅行都會去歷史景點，作為本地香港文青，自己地頭喎，當然都要全部去曬踩吓點啦。
image source:香港旅遊發展局
8 可以一日行幾個博物館都唔厭
文青三大重點：文學、歷史、藝術，當中歷史可能係比較沉重，但係亦都係每個人都應該要關心嘅範疇。以前成日聽人講，要從歷史中學習，唔少文學作品都同歷史環環相扣，要完全了解意義，兩者真係缺一不可。比起一D特別主題嘅展覽，博物館所展示嘅歷史可能對部分人嚟講會比較無聊，但真文青一定可以睇到全情投入！
image source:香港旅遊發展局
7 乜都可以DIY
文青追求嘅就係唔跟大隊，要有自己個人風格，要做到最與眾不同就靠自己DIY喇。唔少人更加係做吓做吓自立門戶，開始搞吓小生意，參加唔同市集。由手帳、帆布袋，到手機殼、皮革品，基本上你諗到嘅文青都可以自己搞掂，其實都係一個幾好嘅風氣嚟，唔洗吓吓幫襯大公司嘅，自己一手一腳整出嚟，無論係送禮定自用，都一樣獨一無二，夠曬心思。
image source:Facebook/ D2 Place Weekend Markets 週末市集
6 睇得書多到都有書味
話曬係文青，除咗影相睇展覽，最基本嘅一環就當然係睇書，有無文學水平真係呃唔到人，一開口就穿煲。而平時Post相，點都要有感而發加返幾句感懷身世，慨嘆人生嘅句子，同靚相互相呼應，所以閒時讀吓書就少不免。例如最多人掛係口邊嘅文青系必睇作家——村上春樹，相信大家都聽唔少，好多文青會講嘅金句都係出自佢作品。
image source:香港誠品書店
5 專業過龍友嘅攝影技術
去咁多地方打卡，如果無返咁上吓攝影技術，點影返幾張文青風靚相放上Facebook，Instagram呢。其實香港好多近年被捧做打卡景點嘅地方，都係因為被文青發現之後紅咗。有好嘅攝影景點，配合埋比龍友更出眾嘅攝影技術，就更加可以「化腐朽為神奇」，將平時大家行過唔為意嘅廢墟、舊牆、公園等等都變成最好嘅背景。
image source:Facebook/ DCFever
4 對手作市集瞭若指掌
香港週末市集越嚟越多，吸引唔少創作者去分享自己手作、或者係賣二手古著等等，同一班志同道合嘅人交流分享。文青當然都唔會放過呢個週末好去處，比起去行商場，喺市集尋寶可以買到比較特別、限量嘅嘢，唔跟風先適合文青㗎嘛～個個市集主題都唔太一樣，去少一個都可能會走寶，而呢D週末市場舉辦時間通常都不定期，要一個都唔錯過真係唔簡單㗎。
image source:Facebook/JCCAC 賽馬會創意藝術中心
3 去書展/書店打足一日書釘
書展係香港每年大事， 無論平時係咪忠實書迷都會去捧吓場，文青就自然唔洗多講，會趁書展大手入貨。至於平時，書店都會係文青常去嘅地方之一，睇吓近排有咩新書，企足一日打一日書釘。以前香港比較多大型連鎖書店，入到去感覺都比較商業化，除此之外比較有文學氣息嘅都係樓上舖小書店，不過自從來自台灣嘅誠品書店喺香港開咗分店，就更多人得閒就去打書釘喇。
image source:香港旅遊發展局
2 不錯過各種有深度嘅藝術展覽
除咗睇吓書，要進一步顯出自己藝術品味，各類型嘅藝術展覽文青當然都唔可以錯過。話明文藝青年，放假又點會行街、Shopping咁簡單，為咗一直累積自己嘅藝術氣息，定期去欣賞唔同嘅展覽都好重要。專業文青一定會定時留意住最近有咩新展覽，唔會錯過任何一個有興趣嘅展，亦都算係逃離平時繁忙生活，比個時間自己放慢腳步感受藝術氛圍。
image source:Facebook/ 香港藝術展覽
1 擁有勁過Google Map嘅Cafe地圖
今時今日一間Café受唔受歡迎絕對唔單單因為飲品同食物嘅質素，更關鍵嘅可能係影相打卡夠唔夠靚！好多呢D特別有Feel嘅Café都唔會開喺鬧市，唔係特登做過資料搜集，真係唔容易發現。而作為一個文青，如果想去Café消磨時間同志同道合朋友傾吓計，吓吓都仲要上網查，就唔夠資深啦。唔少真文青都私藏一個自己嘅Café地圖，全港去到邊都有一間係左近。
image source:Facebook/ GOD DAG 好日
分析說明：
本研究資料由《KEYPO大數據關鍵引擎》提供，分析時間範圍為2018年10月12日至2019年10月11日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『文青十大技能』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。