萬眾期待嘅恐怖片《詭修女》正式上映！
導演溫子仁打造嘅恐怖宇宙終於完整了，
極喜愛睇恐怖片嘅小編琴日就去咗睇優先場，回味無窮呀！
如果你無睇過《詭屋驚凶實錄》同《安娜貝爾》都唔緊要，
因為呢套《詭修女》係以上兩套戲嘅前傳，基本上無睇過都對劇情理解影響不大。
《詭修女》講述1952年係羅馬尼亞一間修道院有位修女自殺，
於是梵蒂岡派出一名神父同一名見習修女黎調查發生咩事。
女主角泰莎法米嘉 (Taissa Farmiga) 之前憑電視劇《美國恐怖故事》(American Horror Story)成名，
依家再接拍《詭修女》，可以話見到佢個樣都FEEL到恐怖片陣味呀！
相信好多人都會關心，咁究竟今次《詭修女》恐唔恐怖？！
熱愛恐怖片嘅小編就當然覺得唔驚啦！
不過戲入面緊張嘅氣氛都型造得幾好，有啲位真係好緊張～
呢方面要讚下！
而且入面都有唔少笑位～
緊張之餘都可以輕鬆一下！
JumpScare（突發驚嚇）方面就稍為失色，因為大部分JumpScare位都估到曬，
如果你係驚嘅話你絕對有足夠嘅時間去遮住隻眼同耳仔。
至於臨尾打大Boss方面，可以話係行左一貫西方恐怖片嘅公式，
變左動作片，同隻鬼打完一場大交之後就完左。
呢一方面小編覺得令觀眾代入唔到恐怖感，
因為戲入面都用左唔少槍／打鬥／斧頭之類去劈啲鬼，令到成件事恐怖感大大下降，
可惜導演溫子仁偏愛用呢種方式打鬼，小編真係摸唔透⋯⋯
最後結局有將劇情呼應返《詭屋驚凶實錄》嘅劇情，
解釋咗《詭屋驚凶實錄》嘅主角點解會見到鬼修女，
睇完《詭修女》之後意猶未盡嘅話，大家都可以去睇埋出咗兩集嘅《詭屋驚凶實錄》。
總結一下，如果你係對恐怖片免疫嘅大膽觀眾，呢套野應該嚇你唔到，不過小編身旁嘅朋友就嚇到死。
順帶一提，原來《詭修女》女主角泰莎法米嘉就係《詭屋驚凶實錄》嘅女主角韋娜·法米加（Vera Ann Farmiga）嘅親妹妹。
兩姊妹一齊參與一個系列嘅恐怖片演出，都幾有趣！
（小編公告：如果讀者有任何關於美食、旅遊、玩樂、或者任何新奇有趣事物嘅資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）