Gareth.T嚟到九月先推出今年第一首廣東歌《偶像已死》，係一首相當有共鳴，且震攝人心嘅作品。
「沒有神 只有鬼 蠟這刻正在融 心見底」
相信唔少人都試過視一位歌手、演員、運動員等等為偶像，每日留意相關消息，見到佢就會感到幸福快樂，成為精神支柱，甚至失去理智地追捧。喺心中偶像同神無異，做咩事都係正確，不容爭辯。
「曾為祢 俯首拜跪 然後空心的美麗 蒙塵 猝逝」
可惜喺依個年代，太多偶像做出令人不屑嘅行為，當得知對方「真面目」後難免會失望無奈，難以接受，一下子打破心中完美嘅形象，腦海一切美好遐想瞬間幻滅。曾經以為自己最熟悉嘅人竟然如此陌生，再唔係或者根本一直都唔係幻想中嘅聖人，只係一個虛構角色。
頓時彷似失去生活寄託，如夢初醒，原來過去嘅快樂通通係假象，回望自己各種瘋狂行為係咁可笑。
「從前為了 幻覺 和 幻聽 去追虛假的 救星 執迷不治症」
其實要視一個人為偶像並無問題，畢竟喺苦悶嘅生活中總要找點樂趣。不過要知道佢地私底下只不過係凡人，同樣會有犯錯同黑暗一面。我地可以欣賞佢地嘅作品或者演出，但要避免盲目崇拜，否則只會令自己難受。
「曾經跟偶像 銀河暢泳 虛構劇情 亦曾溫馨 這夜含淚 割斷求夢醒」
《偶像已死》採用懷舊曲風，編曲特別，富年代感中又有點新感覺，一開始嘅小提琴獨奏已經好有味道，歌詞擲地有聲嘅批判喺弦樂伴奏下更入腦。配上MV所營造出嘅陰沉恐怖氛圍，突出歌曲嘅壓抑痛苦感，相當震撼。
「神已死 人已醒 嘆怨念 尚難淨」
作為一個主要聽廣東歌嘅樂迷，一開始認識湯令山其實唔太習慣佢嘅曲風同唱腔，但聽咗一段時間，慢慢細味後就徹底愛上了。
我特別欣賞Gareth願意喺題材同音樂上作出不同嘗試，每首新歌都充滿新鮮感，咬字同演繹亦一直有進步。由起初英文歌令人眼前一亮，慢慢連廣東情歌都carry到。《偶像已死》再次證明佢係一位有濃厚個人特色同才華嘅唱作人，成功創出一條獨特音樂路。
「從前話祢耐看 而動聽 祢的真身一看清 猖狂依附症 只留低毒性」
你心中又有無一個已死嘅偶像？
《偶像已死》 Gareth.T
作曲：Gareth.T / Teddy Fan
作詞：黃偉文
編曲：Gareth.T / Teddy Fan / Justin Yau / Gabriel de Leon
監製：Gareth.T / Enoch Cheng
「原來是個 幻覺 和 幻聽
幸福感 出於假定
神已死 才看清
錯替蠟像亡命
從前為了 幻覺 和 幻聽
去追虛假的 救星
執迷不治症」
▼Follow hkpopculturelover
Instagram: https://www.instagram.com/hkpopculturelover/