作者: Linda Yau 邱蓮達
正值紅噹噹嘅日本草莓季，九龍酒店推出【草莓戀人中西下午茶】，Well，中西合壁嘅 Afternoon Tea 都係第一次見，咁有創意會唔會好伏㗎，點都要試試。
九龍酒店一向出名食手工菜，就好似每年大熱嘅奶皇月餅，曾與嘉麟樓分一天下，皆因係由餅房師傅親手做，唔係機做，自然啖啖甘甜軟糯，亦好快迅速售馨，所以我都好期待今年嘅手工月餅；而佢地新年推出嘅賀年糕點同樣出眾，特別係芋頭糕，買嚟送比親朋好友，個個食過返尋味，一致正評。
講返個 Tea 係自費唔係廣告。因為正值新年同情人節，同埋加上要趕住飛，點都要向另一半花下心思。今次用餐地方係2樓中間道酒吧，背靠英倫風嘅半島酒店，唔講真係以為去左歐洲咁。說時遲那時快，好快上左個 Tea Set，鹹甜點一共有13款連埋餐飲，平日都只係$270/1位，價錢絕對抵啦。
最令人驚喜的是 Tea Set 每件點心份量非常大，係大得過份，絕對唔係走 Finger Food 路線，Um ………曾經有一刻懷疑人生到底係嚟食 Tea 定 Brunch。
先說說5款鹹點，酒店好 Vegan Friendly，牛叔叔個一部分係正常，而我個一部分係可以轉換素食，唔洗下下佢要食埋我個份，而我又眼定定望住佢起勢咁食，完全 Fit 哂大家嘅需要。正常部分有勁厚肉嘅【法式蟹肉鵝肝包】，個包唔係普通嘅漢堡包，而係迷你法包，烘得外脆內軟，鵝肝肥厚入口幼滑如絲，豐膄甘香，加埋鮮甜嘅蟹肉，充滿驚喜，無懼三高偶然吃一次也無妨。
另一主打係【燉金箔鮑魚】，鮑魚夠哂大隻同彈牙，加埋金箔，真係好有睇頭；個鮑魚汁牛叔叔話好鮮甜，最後佢連個汁都唔放過一飲而盡。
而【粉紅松露素菜餃】就真係無得頂，粉紅色石榴球造型已經好吸睛，比我影完相後，雖然攤凍左，但個餃皮依然Q彈；而入面嘅雜菌饀真係一絕，煮得夠乾身，唔會濕淋淋一堆野，好彈牙同好有口感，加埋菌香同松露香，煙煙韌韌好好食，龍逸軒出品果然夠哂高質。
【法式慢煮龍蝦酥盒】同【沙律醬蝦多士】牛叔叔話就正常發揮啦，淨係一味話好好食。
大戰完鹹點後，好快到甜點，一共有8款，肚皮有限，食左啲想食嘅先。【英式鬆餅伴草莓忌廉及果醬】係我必食，Scone 比較鬆軟，唔會濕到黏喉同幾重牛油香，算係合格啦；食 Scone 一定要加 Cotta Cream，否則好似若有所失，唔夠完美。而呢到嘅 Cotta Cream 係 House-made，今次仲加入左草莓醬，粉紅色夠哂 Girly，入口軟滑，奶香中帶有微微的草莓香，加埋果醬同埋 Scone 內嘅提子乾，多種果香加埋一齊令整體感覺好奇妙，每一種味道都好有個性；有時人生就係咁，多個經歷撞埋一齊，先至值得去回味。
而【草莓熱香餅】同樣搶鏡，食左咁多鹹點同 Scone，真係覺得份 Pancake 有點份量。據餐廳經理說大大粒嘅爆汁日本草莓係餅房師傅每日親自挑選，所以係特別香甜，一啲酸味都無，絕對係落重本，加埋煉奶、忌廉同鬆軟無比嘅熱香餅，真係值回票價。
中式點心【流沙奶皇煎堆仔】就很合我心意，因為我比較鍾情於中菜，香綿軟滑嘅流沙奶皇餡，滿口甘香蛋黃香，加埋煙煙韌韌嘅金黃脆皮，一口一個，小巧精緻，散發出幸福感，所以佢地出品嘅奶皇月餅係好值得去等待。
食到咁上下，飲返杯【野草莓凍湯】消下膩，如其說凍湯，應該係一杯特濃野莓Smoothie，好 Fresh 好有野莓香，一飲即開胃，成個人即場醒哂。【金箔草莓意大利奶凍】就用野莓凍湯作為秘製果醬，加埋幼滑嘅 Panna Cotta，酸酸甜甜加上奶香，口感濃郁，少女心一瞬間爆發。
九龍酒店有個招牌甜點就係拿破崙，佢嘅出場率特別高，係 Buffet 大熱甜品之一，仲有少見嘅【火焰雪山】同【梳乎里】同樣都係 Buffet 必食，下次先同大家介紹。今次 Tea Set 有【自家製草莓拿破崙】，拿破崙酥皮夠哂香脆鬆化，同埋好有牛油香，加埋吉士醬同草莓粒，口感香滑，甜而不膩，食埋呢個真係飽到反艇，已經食唔落個【草莓綠茶卷】同【馬卡龍】，只好將佢地乖乖打包回家。
草莓戀人 中西下午茶
供應時間︰下午15:00-17:00
地址︰香港九龍尖沙咀彌敦道 19-21 號 2 樓中間道酒吧
電話︰2734 3803
eShop : eShop (星期一至星期五每位港幣 $270.3)
作者: Linda Yau 邱蓮達
Contact Me :
Facebook: Linda Yau – 邱蓮達
Instagram: kitlindayau
Website : https://kitlindacat.com/
e-mail : kitty-yau@hotmail.com
請追蹤癒報:
Facebook: hkhealpy
Instagram: hkhealpy
YouTube: @HealpyPost