方皓玟叱咤食白果 火速換衫食豬大腸2022再努力

方皓玟(小明)今年殺入「2021年度叱咤樂壇流行榜頒獎典禮」的「我最喜愛的女歌手」最後5強，可惜最終食白果，獎項由鄭欣宜奪得，雖然失落獎項但卻無損其超靚心情，完騷後火速換衫去附近食豬大腸，盡顯其平民本色！是日再放靚相到IG，心情靚爆，明言2022繼續努力做好音樂！

昨日「2021年度叱咤樂壇流行榜頒獎典禮」主題為「即刻青春」，一眾年青偶像如Mirror、MC張天賦、MC $oHo & KidNey等大豐收，較資深的偶像如方皓玟、許廷鏗、謝安琪等統統食白果。不過態度樂觀的小明完騷後即往醫肚，並指：「冇獎換衫去食豬大腸。唔食邊有力做歌，2022繼續努力！」身穿便服的小明原來喜愛平民美食豬大腸，果然是個貼地女歌手。時隔11小時，小明再於IG貼文，以大頭靚相與各位say hi，似乎首個離婚後的聖誕及新年並未影響她的情緒，狀態大勇。