MIRROR演唱會網上直播收$380 粉絲擔心播放質素：上次有聲冇畫面

MIRROR將於今個月25日首度踏上紅館開騷，雖然連開12場，但由於真正公開發售的門票數量有限的關係，好多粉絲都呻話搶唔到飛！去到今日，MIRROR就為一班MIRO送上好消息，宣佈演唱會其中三場將進行網上直播，搶唔到飛及在國外的粉絲都有機會睇到12子的演出。

今日網上直播平台MakeALive在官方IG公佈《FWD 富衛保險呈獻:MIRROR.WE.ARE LIVE CONCERT 2022》網上直播場次分別為7月30日、7月31日及8月5日三場，粉絲可選購「MakeALive體驗優惠套裝」，每場費用為380港元，購買後可以同時使用2部裝置睇騷，及自行選擇大會主畫面或四面台自選畫面播放。另外亦有只限MIRO會員購買的「MIRO專屬套裝」，每場費用為280港元，除了有大會主畫面及四面台自選畫面外，更有MIRO專享後台直播，此套裝亦可同時使用3部裝置欣賞畫面。網上直播門票將於7月15日中午12時公開發售，去到當晚演場會開場前晚上8時15分才截止購買，保證所有粉絲都可以睇到。

消息公開後不少粉絲都感到開心，但有人表示之前透過平台APP觀看直播時曾出現有聲冇畫面的情況，擔心平台今次會出現同樣問題，亦有人呻：「呃多次會員錢，會員入左（咗）會，現場又去唔到，仲要俾（畀）錢睇電視，咁同等演唱會dvd有咩分別，只係提早提咋喎，都唔知入會嚟做咩」等。