明星代言身價唔低就當然，始終娛樂圈今日唔知聽日事，有得搵自然要盡搵。不過無情情畀人爆身價，當然大鑊，因為呢行就係跟紅頂白之地，論輩份論身價，點解佢代言嗌呢個價？我上次係咪叫低咗？呢啲問題真係有排諗。
最新嗰單劉俊謙喺一個完全唔關事的群組，畀人公開身價。當然呢份260萬報價單，除咗佢代言費，都包埋廣告公司CAP水，但到今日涉事保險公司、廣告公司同劉俊謙都無否認過，就已經畀街外人一個印象，劉俊謙就係呢個價。點解份報價流出嚟，涉事者有幾缺職業道德同操守，真係講都費事。但廣告都上咗，至少呢份報價應該係畀咗錢，劉太們都唔使太傷心。
搵劉俊謙做代言，仲贊助埋助埋Coldplay啟德體育園開show，主要都係做Branding，對賣保險產品幫助有幾大，好難量化。而且對佢股價有幾支持，相信都唔係好有用，事關今年起計截至11月30日，據萬得數據顯示，友邦已經用咗301億港紙做回購，係僅次騰訊（982.8億）、滙控（402.8億），喺港股排第三多，但佢期內股價越買越跌，跌左12.2%，同騰訊（升36.7%）、滙控（升27.0%）可以話係天壤之別，亦跑輸恒指（升13.9%）。
跌到咁，當然係大家睇淡佢前景，可能有人話，友邦中期純利升47%，又加派息，對投資者都係好吖。但買股票，係買前景，如果睇佢新業務價值總計，中期24.55億美金，按年係升咗21%，但主要係因為2023年基數仍然低，而且24.55億呢個數都未回復到2020年27.65億美金水平。當然，呢個係有疫情問題，疫情亦都解決咗，咁前景有咩問題呢?
如果拆返開新業務價值區域去計，大陸同香港合共貢獻16.40億美金，佔總數約三分二，即係成個大中華區有咩冬瓜豆腐，友邦要賣保險就難好多。如果要粗略預計友邦賣得好唔好，基本上睇國統局公佈的社會消費品零售總額可以略知一二。因為中國業務固然係大陸人買，但根據友邦業績，香港業務除咗本地客，都有大陸訪客，即係大陸人幫襯友邦不在小數。
姑勿論佢哋係咪走資，買保險都係一種消費，如果大陸消費唔好，你都預啲錢唔會第一時間用落保險。2020 1H同2020 FY，2022 1H同2022FY，大陸社會消費品零售總額都係按年下跌，無獨有偶，友邦2020FY，2021 1H，2022 1H同2022FY新業務價值都係按年下跌，有一定參考性。
而家大陸基本上玩緊消費降級同通縮，香港又同大陸連繫咁深，兩個業務重點地區都前景不明，未來友邦新業務價值重會唔會帶動到利潤？使咗300億港紙都頂唔到股價，而且見微知著，有無人要為劉俊謙報價流出而負責呢？管理層有無能力喺逆境帶領友邦走出去？
金缸經
註：專欄作家言論不代表本網立場
密切留意BossMind動向！立即CLS