本地疫情再次嚴重爆發，大家都要繼續留喺屋企「避炎」，不過喺屋企又有咩可以做呢？你知啦，香港土地問題嚴重，有時想喺屋企做吓運動都難，除咗煲劇睇戲，仲有咩選擇？有！繽FUN主播嘉琪今次為大家搜羅咗5個經典線上小遊戲，即刻去片一齊重溫吓90後嘅集體回憶啦！
1.燒牛肉
聽個名就知呢個遊戲係要燒牛肉！遊戲用滑鼠操控，玩家要喺限時120秒內燒最多嘅牛肉，燒嗰陣仲會有超仿真嘅音效，建議唔好半夜玩，因為真係會肚餓㗎！
Link： https://bit.ly/2Dgfc9O
2.小朋友落樓梯
「是男人就下一百層」！呢句遊戲開始前畫面出現嘅標語唔肯定有冇性別歧視，但嘉琪就玩到懷疑人生…遊戲係要用左右方向鍵控制角色（注意係鍵盤上嘅左右鍵，唔好學嘉琪以為係滑鼠），協助佢避開障礙物不斷落下一層，到底有冇人真係成功打爆機？
Link： https://bit.ly/33w6hf4
3.夢遊先生
喺呢個遊戲入面，玩家要幫主角夢遊先生清除障礙物同鋪路，令佢可以繼續瞓住覺完成每一關。秘訣係留意滑鼠游標，當掂到可用嘅道具、物品嗰陣，滑鼠游標就會變成指狀，適當運用就可以破到關喇！唔好以為好易玩呀，好多人都要爬文睇網上啲攻略先打得爆機！
Link： https://bit.ly/33mOOG4
4.貓狗大戰
雖然貓同狗唔一定係冤家，但遊戲入面嘅野貓同家狗水火不容，展開貓狗大戰！玩家要用滑鼠控制掟嘢嘅力道，記住要留意風向同風速先可以精準咁擊中對手，最先掟暈對方就為之贏。呢個遊戲最好嘅地方就係可以單人或者雙人一齊玩，同屋企人對戰就可以齊齊消磨一個下晝！
Link： https://bit.ly/3gyieF6
5.動物管理員（Zoo Keeper）
呢個係考你反應同觀察力嘅益智遊戲！玩法係用滑鼠移動動物，只要將三個或以上相同嘅動物連埋一齊，就可以消除佢哋得分，而每個階段都要消除一定嘅數量嚟晉級過關。雖然玩法好簡單，但就玩極都停唔到手，真心推薦畀大家！
Link： https://bit.ly/2Pl1PHN
東網網站 : https://on.cc/
東網Facebook專頁 : https://www.facebook.com/onccnews/