樣子甜美的岑麗香，婚姻生活與其外表一樣甜到漏，同金融才俊老公強強結婚兩年，去年宣布造人成功，更一索得男，對香香錫到燶的強強，早為遷就老婆把工作基地移師香港，老婆陀豬仔，強強決定買大屋迎接金叵羅，更 老婆發辦任揀，近日兩公 婆便密密到西貢睇過千萬獨立屋，日前，強強陪實挺住8個月巨肚的香香，到西環為新居置傢俬，兩人為布置新愛巢精挑細選，揀足個幾鐘甜蜜十指緊扣離開，期間香香還煙韌幫強強鍊膊，恩愛得羨煞旁人！
撰文：東方新地 │圖片：新傳媒圖片、岑麗香instagram、Instagram、劇集截圖
強強 送樓畀老婆岑麗香
現年34歲的香香，16年底同加拿大籍男友強強在溫哥華結婚，香香已講明不設 防造人，去年中約滿無綫，決定不續約改簽王祖藍旗下，刻意減產多留時間陪老 公，去年底香香終於宣布陀B，兩公婆喜上眉梢，強強更安排夏威夷陽光海灘之旅獎 勵老婆，其實「愛妻號」強強，獎賞又何止旅行咁簡單，早就計劃送樓氹老婆開 心，為迎金叵羅亦火速行動，更出手闊綽任由老婆揀買心頭愛。
據知情者透露：「其實早喺上年年頭，強強已經有意買樓，想送間大屋畀老婆，不過香香一路忙拍 劇，根本冇時間睇樓，先拖到依家，老婆有咗之後，佢當然心急，始終住緊嘅將軍 澳舊居得兩間房， BB出世之後真係唔夠住，不過，買樓強強就負責畀錢啫，但揀邊 完全畀老婆話晒事，仲講到明只要香香鍾意，買邊度都冇所謂。」
宣布陀B仔
鎖定西貢獨立屋
連月來，香香同老公強強就四出睇樓，為寶貝仔準備安樂 窩，更鎖定買將軍澳獨立屋。據知情者透露：「香香住慣將軍澳， 呢排西貢同將軍澳有唔少獨立屋新盤，好似海天晉同埋藍塘傲，佢 哋都有睇過，香香就好鍾意嗰度環境清靜，地方又夠大，可以畀BB 有更多空間走動，就算將來香香媽咪或者有親友嚟香港都夠住。」
8個月巨肚
成功陀豬仔的香香，日前挺住8個月 巨肚出巡，同老公強強 去西環睇傢俬，兩公婆更 行到邊都恩愛十指緊扣，而 向來體形纖瘦的香香，陀B 之後身材圓潤不少，不過依然省鏡，絕對係靚媽！
香香同老公有商有量，還細心研究枱凳尺寸，就算陀住B，布置新居亦不假手於人。
直擊揀傢俬
為新居置傢俬，香香同強強專登去到西環一間上樓精緻傢俬店選購，揀啱喜歡款式，更加要試坐保證夠唔夠舒服先買！
大搞網絡金融投資
金融才俊強強在加拿大溫哥華從事財務管理工作，早在15年已 在當地做老闆，不過，對香香呵護備至的他，就甘為老婆放棄一切 搬來港定居，重新開始融入香港生活，無非為同老婆朝夕相對。據 知情者透露：「強強喺溫哥華讀完大學之後，一路都喺一間好出名嘅 證券公司做嘢，15年佢仲做埋嗰間公司嘅合夥人，發展可以話上晒 軌道，不過，佢知道老婆好鍾意演藝工作，為咗遷就老婆，佢寧願 放棄晒嗰邊嘅工作、家人同朋友，搬嚟香港定居，真係令香香好感 動，雖然一切重新開始，不過強強好有生意頭腦，喺香港發展難唔到佢，今年佢仲大搞網絡金融投資，又同香香聯名搞網上商 店，百足咁多爪，好積極賺奶粉錢！」
老公本事又錫自己，香香就曾公開大讚老公：「老公好偉大，拍拖初期，佢試過有段時間專登辭咗份工，為咗可以有 一個月嘅時間日日陪我，見大家身邊嘅家人同朋友，互相了解，就係因為佢嘅偉大，我先可以做到想做嘅嘢！」
幫強強鍊膊
同老公強強時刻都咁煙韌，在傢俬店揀足個幾鐘，離開店舖時香香仲突然幫 強強按摩膊頭，相當 sweet！
同老公一齊去停車場收費處畀錢，即使有外套遮掩，但 從側面睇，香香個肚已經籮咁大。
對老婆照顧周到
無時無刻將老婆放第一位，知道老婆陀B辛苦，強強更不 會掉以輕心，時刻服侍周到。據知情者透露：「強強好錫老 婆，香香有咗之後，佢更加緊張，怕老婆悶，好支持香香大 肚仲間中做吓嘢，不過，佢好緊張照顧老婆出入，盡量都會 自己揸車接送香香，唔好話有咗，之前佢都唔使香香做粗重 嘢，屋企家頭細務乜都佢做晒，大肚婆胃口變晒想食咩又要 即刻食到，就算三更半夜，只要香香講一句，強強都會撲去 買，知道香香好鍾意飲橙汁，佢就專登買定一大支放喺屋企， 等香香幾時都可以飲到，但點知香香突然轉口味話要飲蘋果 汁，佢都即刻落街買過！總之就任勞任怨乜都就晒老婆啦！」 BB預產期在四月，已經停工的香香，日前就孖住老公出 巡去西環睇傢俬，兩公婆行去邊都手拖手非常甜蜜，期間兩 公婆睇中一張餐枱及餐椅，香香同強強就輪住試坐，又細心度尺寸，為新居一枱一椅揀得好用心，努力為寶貝仔做足最好準備！
緊張扶實
兩公婆行去停車場攞車，雖然挺住 8 個月 B ，但香香行路仍然非常瀟灑，不過廿四孝老公強強就時刻都表現緊張，不時體貼伸手扶實老婆條腰。
傍實落車
為新居揀完傢俬，強強揸車載老婆到西環荷蘭街一間意大利餐廳吃燭光晚餐撐枱腳，強強更緊張傍實老婆落車。
親切友善
發現記者，香香表現友善同記者打招呼，身旁的強強亦笑容燦爛，兩公婆同樣親民冇架子。
體貼開門
廿四孝老公強強，細心拉開門讓香香行入餐廳。
依偎睇餐牌
兩公婆撐枱腳心情靚爆，就算要等位仍笑容滿面，香香更依偎著老公一齊睇餐牌揀嘢食。
晒比堅尼背影
去年12月到夏威夷旅行，強強就為老婆拍下唔少靚相，香香亦有在個人社交網晒出著比堅尼泳衣的背影照片，陀B5個月的她，明顯手腳仍然纖幼fit到爆！
做孕婦瑜伽
陀B後香香胃口大增，她亦唔怕肥覺得最緊要是讓BB爭取足夠營養，加上有做孕婦瑜伽保持健康狀態，絕對係緊張媽媽。
回顧岑麗香10大無綫劇集角色
「香香公主」岑麗香去年6月離開TVB，目前懷孕八個月，短時間內都唔會再睇到佢演出劇集！雖然話香香演技仍有進步空間、講對白仍需努力，但其觀眾緣真係無得頂，總是令人好有親切感，唔睇開電視都會想睇佢！岑麗香效力TVB七年，一共喺20套劇集演出過，邊個角色係你至愛？
2010年華姐冠軍
1984年出生的岑麗香，2010年時以26歲之齡奪得國際中華小姐冠軍，其甜美燦爛笑容令人印象深刻，之後成為大台當家花旦之一。後來演出劇集《巴不得媽媽…》的「香香公主」大受歡迎，自此大家都喜歡叫岑麗香為香香公主。
香香在加拿大溫哥華土生土長，唔止樣靚身材正，更擁有時裝設計學士、市場管理學士以及人力資源學士的文憑，美貌與智慧並重！
16年成人妻
2015年10月，岑麗香被揭露與6呎高的金融才俊Joshua(強強)拍拖，其經理人公司承認和祝福兩人，之後香香與強強在16年於溫哥華舉行婚禮，婚後強強為了愛妻來到香港定居，兩人過著幸福快樂的生活。
今年6月宣布離開TVB
今年6月時，岑麗香承認跟無綫完成七年合約並且唔再續約，佢在IG上載一張笑容甜美的靚相，並寫下千字感言：「我還記得我第一次踏入TVB去參選國際中華小姐… I can’t believe so many years have come and gone and that our contract is now finished. Words can not fully express the gratitude, respect and appreciation that I have for my TVB family in my heart. 呢咁多年唻我相信神係擺咗好多天使係我身邊… Ms Lok, 你一直保護同埋教導and guide我，因為你唔想一個傻傻地嘅我行錯路. 沒有說話可以表達 the gratitude I have for you, our mamabear. Thank you」
出活動孕味濃
半年後，岑麗香星期日(12月3日) 出席活動時，身穿性感低胸短裙及三吋高跟鞋現身，看起來比之前圓潤了不少，面圓圓又肚凸凸，孕味濃喎！不過當時香香就話：「適當嘅時候會同大家講，畀少少時間我，努力中。」
香香公主榮升香香媽媽
不過事隔幾日，大家已經可以講聲恭喜香香公主！日前(12月6日) 岑麗香就喺IG上載與老公強強的溫馨合照，宣布自己懷孕，並留言「B-a-b-y coming 2019!」，迎來豬年BB！
回顧岑麗香10大無綫劇集角色
岑麗香現已離開無綫，專心等做媽媽，短時間內都唔會再見到其演出！依家一齊回顧香香10大無綫劇集角色！
《巴不得媽媽…》 香香公主
岑麗香成功入屋的作品一定係《巴不得媽媽…》，劇中香香和錢嘉樂一對，完全演活一個可愛儍大姐，「香香公主」更自此成為其外號。另外香香喺劇中一場濕身戲更加係經典，當年被瘋狂Cap圖！
《神槍狙擊》 黎珍
2013年《神槍狙擊》中，香香係唯一的女飛虎隊隊員，劇集前段最多觀眾追看，因為劇中香香經常都係著上貼身小背心進行訓練，又跑又跳實在非常吸睛！但其實此劇主角為周海媚及「不死珊」，香香只係第三女主角，而且佢之後大多係穿著整齊飛虎隊制服，所以收視回落(好似係)。
《On Call 36小時II》車曉彤
《On Call 36小時II》中，香香與《巴不得媽媽…》拍檔羅仲謙再次合作，雖然兩人戲份唔及其他主角，但劇中「車車」與「洋蔥」的感情線十分動人，兩人最終雖成為情侶，但不久後便陰陽相隔。
《衝上雲霄II》莫文翠(Tracy)
唔知大家記唔記得呢？香香都有份演出2013年《衝上雲霄II》，飾演其中一位靚女空姐，同時係劇中胡杏兒家中租客之一。當中大家最留意的，當然係香香又再有泳衣鏡頭啦！
《貓屎媽媽》邊貴知(Grace)
香香於《貓屎媽媽》為兩大女主角之一，都算係演藝生涯第一套戲份最重的劇集，劇中香香與黃宗澤是一對戀人。但劇集始終係TVB一貫的輕鬆小品，劇情沒甚大起大落，收視都相當麻麻。
《實習天使》祁樂
2015年《實習天使》係香香首次擔正女一的劇集，劇集以一班實習護士的故事為主題，但係播出後備受批評，被指出劇情謬誤多多，有違常理，與現實中護士的工作大相逕庭。最誇張係臨近結局的劇情完全失控，網民話直頭應該改名做《實習黐線》。
《火線下的江湖大佬》何寬心
《火線下的江湖大佬》以過氣大佬退下火線，經營街坊食店的故事為主題，有兩大好戲之人鄭則士及黃光亮坐陣，劇中香香係鄭則士女兒及陳煒繼女，演出可人，表演舞獅時亦有板有眼！
《為食神探》唐嘉嘉
2016年20集輕鬆小品《為食神探》，香香飾演唐嘉嘉(BabyKaKa)，係偵探社調查員，亦係馬國明的女神。香香在《為食神探》中發揮屬一般，反而其他配角如黃心穎、楊秀惠及樂曈等更搶眼。
《溏心風暴3》許貝兒(Belle)
2017年無綫重頭劇《溏心風暴3》卡士超強勁，岑麗香亦有份演出第二女主角許貝兒(Belle)，為李國麟與米雪的寶貝女，與王浩信飾演一對近乎《羅密歐與茱麗葉》的苦情人。
《果欄中的江湖大嫂》李樂怡
最後到今年3月播出的《果欄中的江湖大嫂》，為香香離開TVB前的告別作，人妻香香的眼鏡娘造型極具魅力，不比陳煒及馮盈盈遜色，靚女、可愛之餘，仲多了一份書卷味！
人妻香香前面好似無盈盈咁「凸」出，不過輕輕一轉身再露出白滑誘人玉背！香香就話自己平時出trip都係着三點式，呢日已經唔算特別性感，所以唔使問准老公強強！