【理財教室】新台幣走勢強勁　移民台灣知多啲

兔兔：熊大，我睇新聞話台灣分三個階層放寬防疫措施，最快10月就可以開放旅客入境。我地好耐都冇去旅遊了，不如下個旅遊地點去台灣？

熊大：好呀！不嬲我都交畀兔兔你話事。

兔兔：嘻嘻（甜笑）。一場疫情令環球經濟受到重挫，唔少國家的貨幣走勢過去一年都比較波動。目前港元兌新台幣匯價大約係3.75，呢個水平算唔算抵？如果10月先去旅遊，而家好唔好兌換定？

熊大：睇返港元兌新台幣過去3年的走勢，其實大部分時間都係3.8算之下，現水平靠近3.8算，其實都算吸引。

兔兔：我見由上年7月開始去到今年3月，港元兌新台幣匯價一直跌，背後原因究竟係咩？

熊大：中美關係緊張，加上疫情對全球經濟造成衝擊，本來令到唔少國家的貨幣走弱，不過見到港元兌新台幣匯價喺上年7月至今年3月期間持續下跌，即意味新台幣升值，港元兌新台幣的成本增加。

熊大繼續說：貨幣升值的原因主要係因為有外資的流入。中美貿易關係，唔少商家返台灣投資設廠；近年本地政治不穩，唔少香港人有移民到台灣的打算；再加上疫情衝擊下，台灣首季GDP仍能保持正增長，反而亞洲很多地區的經濟體出現了負增長。反映台灣當地喺防疫方面做得不俗，各大產業喺疫情期間冇停工，可以繼續出口，令當地經濟唔會因為疫情而停濟或放緩。以上種種原因都令新台幣走強。

兔兔：如果台灣三個階段放寬防疫措施真的如時間表推進，去到10月，有大批遊客湧去台灣旅遊的話，新台幣仲有冇進一步升值空間？

熊大：就基本面而言，台灣當地疫情問題較其他國家輕微，經濟陷入衰退機會唔大。如果10月成功開放遊客入境的話，即係代表台灣經濟前景理想，新台幣有機會推升至更高水平。

兔兔：如果係咁，而家仲應唔應該兌換定新台幣？

熊大：如果你睇好疫情唔再有第二波爆發，10月可以到台灣旅遊，港元兌新台幣匯價靠近3.8算其實可先兌換定部分資金。如果外圍突然出現不明朗因素，令港元兌新台幣匯價升穿3.8算甚至去到4算之上，到時可以再兌換另一部分資金。分階段入市幾時都係最穩陣的做法。

兔兔：熊大你頭先提到最近好多人想移民到台灣，如果真係10月去得成台灣旅遊，不如我地都喺當地了解一吓相關資訊。

熊大：而家香港地生活愈來愈艱難，唔少人都萌生起移民的念頭，台灣本身移民門檻低，生活水平唔高，地點又近香港，兩地冇咩文化差異，所以每年都有好多香港人選擇移民到台灣。

兔兔：目前香港人移民到台灣可以透過咩途徑？

熊大：一般有四種方法，分別係投資移民、創業移民、技術移民同升學。

兔兔：投資移民的要求係咩？

熊大：投資移民需要喺台灣投資600萬元新台幣（約155萬港元），通過審查就可獲得居留證。同時要喺台灣連續住1年，期間離開台灣唔可以超過30日；或連續兩年內，每年都喺台灣住滿270日，就可申請定居證入籍台灣。

兔兔：咁創業移民呢？

熊大：創業移民需要的資金比投資移民為低， 200萬元新台幣（約51萬港元）就可。但創業移民的申請程度和續簽條件都比較複雜，創業公司每年要通過營業額、費用、聘用當地員工數量等數字上的核查。而以創新創業名義申請留台的香港人，需要喺台灣連續居留5年，且每年居住183日以上，先至可以向內政部移民署申請「定居證」，之後就可以申請台灣護照，永久居留喺台灣。

兔兔：其實台灣距離香港咁近，即使拎咗台灣戶籍，第日要返嚟香港都好方便。

熊大：係呀，我地如果10月去得成台灣玩就好喇。

【編按】今期是本欄最後一期，多謝大家一直以來的支持！