【頭條獨家】老友未婚妻陳詩欣做媒人　鍾培生街邊食住雞蛋仔「選妃」

百億富三代鍾培生與林作將於9月假九展Star Hall進行「林鍾一戰」，掀起全城熱話。早前，有網民翻摷2018年TVB播出的《女人四十》片段，當時鍾培生對主持田蕊妮直認「對異性需求大」，令阿田不禁說：「明白點解佢搵唔到女朋友。」自爆放長假18日做愛做足52次的鍾培生目前單身，可能好Dry，老友陳爾正（Joshua）的未婚妻陳詩欣都忍唔住開IG「介紹」囡囡畀對方識！採訪：梁志明
究竟鍾培生同陳詩欣有咩淵源？其實去年11月向陳詩欣求婚的陳爾正，與鍾培生是識於微時的好兄弟，近年兩人都有不少生意合作。日前傍晚6點半，陳詩欣跟Joshua出銅鑼灣搵鍾培生，《頭條日報》記者於總統戲院附近的小食店門口，撞到3人拉低口罩Share一份雞蛋仔兼吹水。其間，穿印上其口頭禪「No Bullshit. Let's go.」字樣白Tee的鍾培生，邊𡁻嘢食邊Talk，仲講到一額汗，佢不停用手臂抹額頭的汗，而在旁的陳詩欣正努力劃手機中，忽然好似發現「新大陸」般Show部機畀對方睇。
鍾培生個樣真係好特別
後來記者發現，原來陳詩欣於IG朋友堆中，物色靚女又騷相畀鍾培生過目，估計是想做「媒人」幫對方牽紅線；鍾培生睇完第一張相後，把口就冇停過Non-stop咁講，未知他又發表咩偉論呢？搞到企喺隔離的女顧客露出古怪的眼神，並偷偷恥笑他。看了幾張相，鍾培生似乎對其中一個女仔感興趣，更用自己手機影低陳詩欣個Mon，隨即狂打字，唔通「心動不如行動」私訊緊對方？之後，3人步行至附近冰室飲嘢，有「香港電競之父」之稱的他一坐低就打機，最後同陳氏情侶傾多45分鐘，便獨自乘的士回家。