林芊妤 Coffee近日接受陳敏之邀請，到她最近新開的YouTube Channel節目《chi chat》做訪問。短片中，兩位媽媽同聲同氣，好合拍，提到兒子，林芊妤甚為緊張。除此之外，她還重提自己當年全城轟動的新聞，指當時被很多人中傷，她都選擇沉默應對，結果被老公鬧完，才明白要學會保護自己，做兒子的好榜樣。不少網民大讚今集好有意義，非常勵志、正面。
撰文：Clara | 資料、圖片來源：陳敏之YouTube Channel
林芊妤放假寧願陪仔 懂放手讓兒子獨立
一開始是二選一問答環節，「有仔萬事足」的林芊妤笑言現在放假寧願同兒子玩，也不會陪老公：「未生仔前就擔心好影響我哋二人世界，我會唔鍾意佢，會好憎佢。點知出咗世之後，我連老公喺邊都唔知。我老公出去飲嘢，我完全無打過電話畀佢。佢返嚟我同佢講：『你細聲啲啦，啲酒味整到BB啊！』」陳敏之感同身受：「老公話去打桌球，凌晨先返，我直情話：『喂返嚟好嘈啊！嘈醒我！」
被問到想未來新抱對兒子好，但對她呼呼喝喝，還是對她好，但對她兒子不忠。林芊妤與陳敏之異口同聲選擇前者，最錫兒子的林芊妤表示：「我諗每個阿媽都係咁諗㗎啦，黐線，邊個阿媽會揀個仔戴綠帽啊！」
她補充自己雖然愛黐兒子，但等兒子長大後，她會放手讓兒子獨立，與老公遊山玩水，拒絕婆媳同居，主動避免不必要的糾紛，是個開明奶奶：「我好早就會離開佢（兒子），唔會被佢（新抱）虐待我。睬佢都傻啦，佢結咗婚我仲喺度被佢指指點點。你想同我住，我都唔會同你住。」
覺得肉體出軌不是出軌
有關老公「精神出軌」、「肉體出軌」的問題，林芊妤不能接受前者︰「我覺得肉體出軌唔係出軌，需要之嘛。都有出軌…但精神出軌嚴重性更大，如果佢真係鍾意咗第二個，佢個心唔喺你度，我覺得係問題。」不過她最後都強調兩種都難以接受：「呢啲嘢真係可一不可再，如果你真係有，我一定會離婚！」
瑜伽幫自己走出人生低谷
早年林芊妤於14年經歷「Gathering事件」，被好多網民指指點點，陷入人生低谷，曾想過做傻事：「好難捱……會唔會食多幾粒安眠就咁瞓咗就算？」她指其實當年公司叫她主動解約，令她很迷茫：「我好唔想走，我覺得只不過係咁樣嘅意外，我都唔想發生。我可以去邊呢？個名又咁，我以後條路點行？」
後來，她找到瑜伽這個興趣，開設YouTube Channel，成為香港數一數二的YouTuber，還開設瑜伽用品店舖，很受OL歡迎，成功創業，她說：「瑜伽幫咗我！有啲會逃避，但你過唔到自己，呢一世都有陰影…你要畀自己沉澱吓，我嗰陣都係硬撐…唔好咁認真，啲人笑你之類，都只係茶餘飯後嘅話題。」
被司機中傷忍持啞忍 老公：你咁點保護個仔
林芊妤指以前公司都會教藝人發生甚麼事最好沉默，讓事件淡化：「我依家係極度唔贊成呢句說話，呢個心態好唔健康，唔可以教育好下一代。以前我以為流言止於智者，但老公令我明白，有時啲嘢要自己出聲捍衛！」原來之前，她即使被誣衊都會選擇「硬食」。
有次她跟老公搭的士，她戴上口罩，的士司機說：「好似Coffee咁囉！你睇佢一件咁嘅事，依家就紅到咁……嗰時我唔知見到佢同好多男人…」當時老公下車後反問她為何不反駁對方，她回答：「算啦，佢都唔係邊個，唔通同佢嗌交咩？咁我真係無吖嘛。」
結果回到家，她被老公指責：「佢好嬲，點解我唔保護自己呢？點解唔為自己企出嚟，但我好習慣係咁，以前發生嗰件事都係唔出聲由佢過咗去就算。咁佢個重點就話，咁你點保護你個仔？當你個仔喺度讀書嘅時候，佢一定會面對呢啲人，你係咪要佢同你同一樣嘅方法去對人？佢咁樣講完，我即刻想喊，原來我唔識教小朋友，因為我咁軟弱嘅人，由得人攻擊飛我，我唔出聲，等於我教我仔，如果有人鬧佢、打佢都唔敢出聲……咁一定唔得！我終明白有啲嘢要自己講出口，勝過人哋講一百句！」