湯怡和麥秋成於周五（2月26日）元宵佳節在陽明山莊舉行了一個簡單註冊儀式，除了有Regen （張惠雅）做伴娘、崔建邦做司儀外，仲有英皇老闆楊受成及高層許佩斯、天王郭富城、樂易玲、Sunny Wong、Dear Jane成員Jackal等紛紛到賀，其中老闆楊受成更送贈了一對巨型龍鳳鈪給湯怡一路戴住出嫁，份量十足！
文：東方新地｜圖：東星圖片及麥秋成、陳偉霆、霍汶希IG圖片
湯怡 麥秋成 舉行簡單儀式
在婚禮當日早上著上中式裙褂的新娘湯怡和新郎麥秋成在伴娘Regen撐住紅傘的陪伴下出來「行大運」，姊妹和兄弟團則在兩旁夾道相迎，據知今次伴郎由麥秋成的胞弟擔任，兄弟團則有朱薰老公。
麥秋成畀大袋開門利是
Regen大讚接新娘時麥秋成畀開門利是畀得好有誠意，她笑言：「新郎準備咗一大袋利是畀我哋攞，不過我哋未數，所以暫時唔知有幾多錢。因為麥秋成本身係排舞大師，所以我哋安排咗佢做一啲人類唔可能做到嘅瑜伽動作，仲有講啲愛的宣言咁，到咗斟茶嘅時候大家仲喊晒，好溫馨！」
湯怡父母恨抱外孫仔女
Regen又指湯怡爸爸媽媽好恨抱多幾個外孫仔女：「頭先Auntie、uncle係咁轉龍鳳鈪，人哋話轉一個圈生一個，湯怡媽媽扭咗三次，湯怡爸爸更加係狂扭、不停扭，希望佢生多啲啦，哈哈哈！」她又指完成婚宴後，一班姊妹已計劃和湯怡一齊去打邊爐慶祝。
原來湯怡手上一對最搶眼的巨型龍鳳鈪是由英皇老闆楊受成所送，這日楊受成和英皇高層許佩斯一同到場，向湯怡送上祝福。
郭富城：我睇住秋成長大
郭富城現身出席湯怡和麥秋成的婚禮時表示：「我睇住秋成長大，佢幫過我做演唱會，之後佢慢慢發展，到做咗排舞師，佢太太（湯怡）之前喺電影《寒戰》入面做過我秘書，同埋有份參演我最近拍嘅電影《斷網》，佢哋今日結婚，係一件好開心嘅事，所以我一定要嚟祝福佢哋！」又表示等麥秋成忙完婚禮事宜後，會和他分享爸爸經。
由於疫情下限聚令的關係，婚禮舉行前一日湯怡和麥秋成已在社交網表示今次嘉賓人數會有所限制，並承諾在疫情過去後，兩人會再補辦一場大型婚禮。
而陳偉霆雖然正身在內地，但都好關注湯怡和麥秋成的婚禮，在社交網貼出了兩人在台上親吻的照片，並寫上：「永遠幸福快樂。」
經理人Mani（霍汶希）亦在社交網感性表示：「恭喜最美麗嘅新娘子。由佢（湯怡）十幾歲嘅『少女黎姿』開始，一直見住佢成長，到而家結婚、成為準媽媽，真係好開心，祝福佢白頭到老永結同心。」
麥秋成：想生夠5、6個
到了下午一對新人換上西式婚紗和禮服再度現身，湯怡手上更戴上了一隻兩卡鑽石婚戒，她透露BB預產期在7月尾，而麥秋成則表示對一起跳舞的「戰友」很不好意思，因為疫情關係今次婚宴只可邀請80、90位賓客，所以他只能邀請老師到場。
湯怡話希望待年尾她生完BB並收身後，才再擺酒大宴親朋，麥秋成則指樂易玲教她可以一次過擺埋BB百日宴，他更揚言想和湯怡生夠5、6個小朋友。