曾經喺水晶宮宣佈退休嘅鶴臣，再次執起呢支倫敦球會嘅教鞭。此前，阿仙奴傳奇人物韋拉（Patrick Vieira），喺英超首次嘅執教生涯，亦以一季半多啲嘅時間告終。
短短嘅英超之旅，韋拉證明咗自己係一個有野心嘅教練。佢亦有能力活用年輕資源，喺練人嘅同時維持英超喺生存嘅本錢。但水晶宮呢支球隊，滿足唔到韋拉嘅野心，問題終於隨2023年後成績滑落而爆煲，球會最後唯有分手求變，但求保住來季嘅英超席位。
過去喺紐約城同尼斯，韋拉已經奠定佢主動搶攻嘅戰術風格，嚟到水晶宮亦好快就將隊波執成更進取嘅模樣，令球隊耳目一新，唔再係好似之前鶴臣教嗰時咁悶。
2021-22年執教首季，水晶宮入50球，場均xG有1.22球，平均控球率51.1%，三項數據都啱啱好排英超第十。一季時間就用更強嘅進攻，令球隊由護級邊緣份子，搖身一變成為英超中遊，韋拉嘅英超之旅的確開咗個好頭。
不過，喺水晶宮高層之下，韋拉喺轉會策略上嘅發言權少之又少，轉會決定權喺體育總監費特文（Dougie Freedman）手上。韋拉向來強調，球隊需要收購更多有經驗嘅球員，見過大場面，先至可以真正扶助呢支年輕嘅水晶宮成長。然而，幾位老細喺管理球隊嘅思維上已經差天共地，Parish主張謹慎理財，Textor主張大手交易，球會比唔出明確嘅建隊方案。
舉個例子，2021-22球季，車路士嘅干拿加拉加（Conor Gallagher）以借將身份效力水晶宮，打出極好嘅表現，助球隊坐上第12名。但球會季後冇留佢多一季，甚至直接買斷。新買入嘅中場球員杜古利，球風上更似係高耶迪打開嘅六號位，而唔係加拉加嗰種Box-to-Box。加拉加喺中場帶嚟嘅動力，今個球季冇辦法補上，導致球隊成績近來一落千丈。前鋒伊比奧維、後衛李察士等等嘅新援，都因為傷患、狀態等等問題，而唔能夠兌現當初買入時嘅期待。冬季轉會窗由阿仙奴借入防中盧干加，但好明顯佢唔符合韋拉對「經驗」嘅要求。
總括而言，韋拉今季帶住嘅陣容，比起上一季更加缺乏深度，就難以長期保持佢喺上一季打出嚟嘅強度。而前線人手短缺，門前表現淒慘，沙夏單支難撐，韋拉根本難以變陣。
鶴臣回歸前，水晶宮已經四連敗，剩低嘅執教時間，睇怕喺戰術上都難有咩變化，只能用手上嘅球員盡力求勝搶分，下季搵到新教練再重新嚟過。