賽前有哥斯達黎加擊敗日本、摩洛哥擊敗比利時，連續兩場爆冷為球迷製造驚喜，咁今場克羅地亞對戰加拿大延續驚喜，因為上場壓制比利時嘅加拿大，開波2分鐘一次右路進攻布簡能(Tajon Buchanan)右路傳中，艾方素戴維斯尾柱接應頭鎚破網，攻入加拿大首個世界盃嘅第一個入球。
一球在手嘅加拿大可以著手以4-4-2陣式踢防守反擊，同時前中場嘅遮線能力令克羅地亞難以喺中路組織，繼而初段只係依賴佩利錫係左路落底，但今日艾歷斯坦莊遜(Alistair Johnston)係防守上非常出色，因此早段嘅優勢落係加拿大手上。
不過克羅地亞逐漸適應踢法，逐漸有空間嘅時候利用細膩嘅腳法攻門，36分鐘佩利錫右路禁區K角位比個斜線由卡馬歷(Andrej Kramaric)邊走邊射窄位抽入，成功追平1比1。44分鐘克羅地亞邊路進攻推入中路，由前鋒拉維亞(Marko Livaja)遠射地波得手，上半場加拿大由贏變輸。
下半場加拿大作出調動由艾方素戴維斯打正前鋒，整隊加拿大都加快節奏，希望以簡單直接嘅方法攻門，因為佢哋今場落敗就會出局世界盃。結果，薑都係老嘅辣，克羅地亞控制節奏唔同你打快，而且係70分鐘佩利錫左路傳中，卡馬歷禁區內右閘一控左腳一射拉開比數至3比1。最後補時階段94分鐘，加拿大全軍壓境但中堅米拿控球失誤被克羅地亞2個攻擊球員對住龍門，結果由後備入替嘅馬耶破門，最終克羅地亞以4比1大勝加拿大，加拿大正式出局。
對於世界盃新丁嘅加拿大其實佢哋兩場嘅表現都唔失禮，然而始終大賽經驗不足就會左右整場比賽嘅走向，如同今場嘅體力節奏流放嘅問題，再者球員質素始終有差別，特別係前線嘅埋門把握力，但係有質素同經驗不足嘅問題，能夠以團隊拼勁打出表現，加拿大已經值得掌聲，寄望球隊四年後以主辦國身份能夠捲土重來！
▼ Follow 足球港場頻道
Instagram: https://www.instagram.com/footballarena_hk/