今時今日，抽盲盒公仔已成為潮流，就連ERROR隊友梁業（Fatboy）都是中毒者，他甚至迷得推出新歌〈MASCOT〉，自己更在MV中以一身Mascot打扮示人。
「Mascot」有公仔、吉祥物的意思，近期大熱的Labubu便是mascot，這亦是Fatboy近期的至愛，於是由此出發，創作出〈MASCOT〉一曲，Fatboy道：「我呢期比較鍾意Labubu，歌曲就係inspired by佢喇！而家都好多人鍾意買公仔，或者身上嘅飾物，都會有mascot，所以今次嘅內容，係講有隻mascot陪伴你，就會好開心。」
〈MASCOT〉由T-Ma作曲，新鮮出爐金馬影后鍾雪填詞，當中道出了Fatboy希望傳遞的快樂訊息，而歌曲風格亦從90年代的一些經典金曲中取經，Fatboy續道：「我哋ERROR玩開復古嘢，今次就會有少少似Aqua〈Barbie Girl〉嘅Disco EDM Music多啲，另外亦參照咗我偶像郭富城〈Para Para Sakura〉嘅少少feel，成首歌有少少似同隻mascot互動玩嘅感覺。」
不少人都鍾意mascot，Fatboy在〈MASCOT〉MV中亦為大家帶來驚喜，有不同大小的mascot登場，他介紹：「MV除咗我嘅打扮似一隻mascot之外，我都特登設計咗一隻mascot，佢雙眼矇矇地，但其實佢都係一隻惡魔，呢隻mascot叫做Arthur，又名阿花。MV場景仲多咗兩個293嘅物體，佢其實係平時啲吹氣公仔，佢嘅movement同193嘅movement係一樣，所以我叫佢做293。」
之前ERROR〈黃金聖衣〉中的濟典娜成為MV一大驚喜，今次Fatboy同樣邀請到猛人參與！他笑著說：「今次請唔到濟典娜過嚟，但就搵咗阿部濟，又或者叫佢做濟八通，今次佢客串擔演說書人 ，喺入面串連故事，但其實佢都係值得被欺淩嗰個。濟哥今次嘅造型，係一個破格嘅演出，你知啦！佢成日笑ERROR扮鬼扮馬，今次俾佢扮喇！」
看過〈MASCOT〉MV，或者會覺得整個製作，以至Fatboy的舞步都有暴走感覺，不依正軌發展，亦與Fatboy平時型爆的舞技截然不同，他自己也坦言：「今次係偏向得意但未必係最靚最可愛嘅類型，但都希望大家鍾意〈Mascot〉啦！」