近年韓劇、大陸劇都好受歡迎，其實台劇都有好多經典作品，唔少香港人包括小編睇嘅第一套偶像劇就係台劇嚟，以下呢4套台灣偶像劇梗有一套你睇過！
1. 流星花園
同樣改編自日本漫畫嘅仲有偶像劇經典中嘅經典《流星花園》，劇中除咗男主角之外，仲有3位靚仔合稱F4，圍繞喺女主角身邊。
男主角道明寺係個富二代，霸道，我行我素，喺學校橫行無忌。女主角杉菜出身同F4唔同，但好有正義感，而且個性倔強唔服輸，因為好朋友被F4蝦所以挺身而出同佢哋正面衝突，繼而同F4有所交集。
偶像劇入面，好多時除咗個性霸道嘅男主角之外，仲有一位較為溫柔嘅男二，佢都鍾意女主角，但往往最後女主角揀嘅人唔係佢。
《流星花園》可以話係偶像劇始祖，2001年播出嘅時候喺中港台掀起熱潮，而劇中F4四人更加風靡萬千少女添啊！
2. 王子變青蛙
唔少香港人包括小編都喺tvb睇過呢套台劇，而當時係喺星期日播嘅，所以印象深刻。
明道飾演嘅男主角係集團總經理，而女主角陳喬恩係漁村長大嘅住民，兩個人本來無交集，但一次明道意外盪海，醒返之後就失去記憶，所以就留喺漁村生活，期間更同陳喬恩日久生情。
但男主角恢復記憶之後唔記得兩人之間嘅愛情，返去做總經理，仲要同之前嘅未婚妻結婚，記得小編當時都睇到好投入，為佢哋兩個點樣喺返埋一齊而緊張啊！
呢套劇嘅主角都係當時嘅台灣團體183Club同七朵花嘅成員，劇入面嘅主題曲、插曲都係佢哋唱㗎！
3. 花樣少年少女
《花樣少年少女》都係改編自日本漫畫，由當時極受歡迎嘅飛輪海成員吳尊、汪東城、SHE嘅Ella擔任主角。
故事講述喺美國長大嘅女主角偶然喺電視上睇到男主角跳高就鍾意咗佢，仲為佢女扮男裝轉讀男主角嘅學校，因為扮男裝嘅關係，女主角好幸運咁同男主角就讀同一班，住同一間宿舍，並以男生嘅身份接近男主角。而男主角嘅好朋友就鍾意咗女扮男裝嘅女主角，仲以為自己係同性戀。
男主角之前喺比賽前撞傷咗膝頭哥，雖然傷已經好番，但對比賽產生恐懼與壓力，令佢驚咗跳高，而女主角就喺佢身邊鼓勵佢，令男主角鼓起勇氣重新開始跳高。
有關高中生嘅愛同夢想嘅故事，真係好青春、好熱血啊！
4. 黑糖瑪奇朵
《黑糖瑪奇朵》同樣係由當時偶像團體棒棒堂同黑澀會美眉主演嘅青春校園偶像劇。劇入面嘅角色名直接就係演員嘅藝名，強調本色出演。
劇入面棒棒堂嘅6位成員飾演同父異母六兄弟，為咗繼承一百億財產，需要需要遵守合約相親相愛相處一年，最初互相排斥，後來日對夜對漸漸相處融洽。而佢哋轉學嘅高中遇上同班嘅10姊妹，十姊妹雖然無血緣關係，但係感情超好嘅閨蜜，佢哋互爭班級領導權，由初期嘅鬥氣冤家到後來互相吸引而成為情侶。
7 pair情侶分別係敖犬同大牙、王子同鬼鬼、小煜同小薰、小傑同筱婕、威廉同容嘉學姐、阿緯同丫頭、小馬同彤彤。
呢套劇改名叫「黑糖瑪奇朵」嘅原因係因為「黑」代表黑澀會美眉，而「糖」同「堂」同音，代表棒棒堂。
記得小編當時睇戲睇得投入，連主題曲、插曲都識唱添！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）