TVB台慶劇《新聞女王》首播　逾400人加消防製作「意外現場」

由佘詩曼、馬國明、李施嬅等主演的TVB台慶劇《新聞女王》將於今晚（11月20日）首播，劇集於上周末率先在內地平台優酷播出，除了獲讚劇情超貼地及節奏緊湊、辦公室生存技能夠實用，女主角阿佘被誇讚「連眉毛都是戲」。

《新聞女王》的大型場面認真製作，以開首的巴士翻側意外為例，原來幕後團隊單是開會研究巴士翻側角度，以及走訪拍攝地點計算攝影器材擺位及設定拍攝路線等事前準備，已花了2個星期時間，實際拍攝則花了4日半。

總監製鍾澍佳（人稱佳導）表示，除了動用接近400名台前幕後精英，亦出動了7部攝影機包括航拍：「幕後大概有100個，有負責美術同電腦特技嘅、仲有飛車特技等，臨演有成二、三百位。巴士意外淨係拍冧車同救人都拍咗三日，另外加埋車入面發生嘅嘢，同埋巴士喺出面未翻之前嘅行使情況就拍咗兩日度。」

佳導細述拍攝時的特技細節：「汽車特技同事都話佢試過翻巴士，翻嘅時候用咗少少氣爆原理，以強烈嘅氣流將架車彈起，呢度每個細節嘅設計都要好準確，當然亦有危險性，所以幫手撳氣爆嘅特技同事，正式拍嗰刻都有問可唔可戴頭盔，我當然話可以啦。」

至於劇中第二個大型「意外」工廈四級大火，拍攝效果同樣逼真，佳導坦言相關場口更加複雜，單是前期尋找合適的拍攝工廈已花了不少時間，另外正式拍攝時間亦用了7天，並動用了大量真‧消防員，以保證觀眾看到的，都是最貼近現實的畫面。

佳導說：「拍攝現場有齊救護車同警車，因為想模擬番四級大火嘅真實情況，嗰度用咗好多資源。另外亦都好感激消防處咁幫手，為咗拍出嚟安全得嚟又真實，我哋拍攝除咗有配合消防處嘅更表，消防處仲有幫手睇劇本，因為我哋驚我哋寫出嚟有bug，佢哋幫我哋改番啲操作同流程上嘅錯誤，又分享畀我哋知消防員接受記者訪問時應該講啲乜，因為我哋依家拍嘅係新聞劇，如果連呢個真實感都做唔到，就有啲講唔通。另外除咗有對白同要演戲嘅消防員，其他嘅都係真消防員，因為只有佢哋先識操作啲喉車同上落升降台，其他演員係唔上得去，因為好危險同要好專業。」