叱咤下周昂坪開記者會　姜濤粉絲早十幾日霸位自成「糖區」

商台《叱咤樂壇流行榜頒獎典禮》記者會將於下周在昂坪市集舉行，雖然大會未公佈確實日子，但一眾粉絲早已收風會在11月4日舉行。去年MIRROR全員12子齊齊亮相，一眾粉絲為支持偶像，提前4日到昂坪市集通宵紮營霸位。不過高處未算高，今年有不少姜濤粉絲（暱稱姜糖）預早10多日，由10月20日開始便在昂坪輪班霸位，至今（10月31日）已在記者會舞台、紅地毯附近有利位置「自成一大姜糖區」。

有姜糖在社交平台分享「姜糖區」盛況短片，寫道：「望住依個糖區，乜野辛苦都值得，個區吾（唔）係你噚日上嚟先有，亦都吾（唔）係大會派比（畀）你。個區係20/10凌晨半夜由糖上去昂坪霸位。排左（咗）8日8夜，輪班守住，好辛苦先爭取到返嚟。日頭返工，放工就上昂坪仲有一大堆物資，逐批逐批運上昂坪，衹要為姜濤爭取到最好嘅，乜野都吾（唔）辛苦，乜嘢都係值得。」

對於有姜糖早10幾日輪班霸位，不少粉絲在討論區留言表示驚訝：「記者會有咩好排」、「為個電台搞頒獎禮記者會預早排幾日幾夜」、「政府有冇考慮發展姜糖經濟」……同時亦有姜糖表示感激：「姜濤與姜糖 好得太過份，無言感激。」、「每位排隊嘅姜家人們～一定要照顧好自己！你哋嘅付出真係唔簡單！」、「姜濤好幸福，做到姜濤嘅姜家人更幸福，姜家人有咁嘅姜家人超級幸福」、「真心respect」……