根據Fabrizio Romano嘅報導，英超球會車路士同西甲馬體會嘅交易終於成事，車路士以4200萬歐元將加拉加(Conor Gallagher)出售到馬體會，雙方簽下5年合約，而馬體會就以4450萬鎊出售祖奧菲歷斯(Joao Felix)到車路士，雙方簽下六年合約，並且有延長一年合約嘅執行權。
車路士出售加拉加呢場鬧劇，終於告一段落，事件嘅始末在於車路士出手收購馬體會另一位前鋒Samuel Omorodion，但埋門一腳取消交易，有傳係球員未能通過體檢，亦有傳雙方喺個人條款，未能達成一致，但取消交易令到馬體會並冇足夠財政空間購入加拉加，導致加拉加已經抵達馬德里五日，都要重返倫敦跟隨球隊訓練，食相相當難睇。
本來球員買賣係好平常嘅事情，但係車路士為咗出售加拉加無所不用其極，令一眾球迷對於球隊嘅處事手法感到寒心，特別係對待青訓球員，而且上一季喺場場跑盡嘅加拉加。車路士先係禁止球員參與一隊訓練，嘗試迫使加拉加離隊，其後交易失敗，但為咗出售加拉加，選擇引入另一位球員以達致交易，令人感到無奈。背後原因了解到車路士需要出售加拉加，一位球隊青訓產品以最大程度滿足財政條例，但為咗呢個目的而濫竽充數引入菲歷斯，已經係無視球員嘅發展，撇去足球或球隊嘅根本。
球員個人方面加拉加能夠轉戰馬體會當然係好消息，加拉加「波牛」嘅踢法配上施蒙尼嘅戰術，強悍身軀配上粗糙踢法，經過改善，或許會成為另一位迪保羅(Rodrigo De Paul)，而今季投資超過1.5億歐元引援嘅馬體會，或者能夠成為與皇馬競爭西甲冠軍嘅唯一對手。
轉投車路士嘅菲歷斯能夠離開馬體會，對球員而言係一個解脫，但去車路士是否理想之地呢？確實菲歷斯希望加盟車路士，過往22/23球季外借車路士嘅時候，亦能夠發揮佢部份嘅天賦，創造機會並且同當時仍在球隊嘅夏域斯有啲默契，但如今車路士人滿為患。上季佢喺巴塞隆拿主要擔任左翼或前鋒位置，車路士左翼位置已經有上場正選嘅尼干古，後備換入嘅柏度尼圖，仲未計梅迪歷同史達寧。前鋒位置或者無咁大競爭，但佢嘅身形能否擔任正前鋒角色都係一個問題，因此只能祝佢好運。
▼Follow 足球港場
Instagram: https://www.instagram.com/footballarena_hk/