可能唔係太多球迷會關注西維爾呢隊波，對佢哋嘅印象流於「西甲中游」、「歐霸之王」等等之上。講起歐霸，西維爾今季又一次喺歐聯提早出局，要轉戰已經改例嘅「霸氣盃」。
喺討論佢哋跌落歐霸會唔會反而攞到歐洲冠軍之前，我想討論吓西維爾喺換帥前後嘅變化。前主帥盧帕迪古係喺歐聯第3場比賽，主場輸多蒙特1-4嘅比賽之後被辭退。球隊搵返森柏奧利返嚟，馬上變陣，喺歐聯第4場作客多仔打返場1-1和波，換帥效果立竿見影。而之後嘅5場比賽，除咗對皇馬嗰場西甲之外，所有比賽都有55%以上嘅控球率。
睇返森柏奧利之前喺馬賽嘅成績：平均有61%嘅控球權。回歸西維爾短短唔夠一個月，佢就用咗兩套陣式：一，介乎3-4-3 / 4-3-3之間嘅流動陣型。二、喺中堅尼安祖受傷後改打4-2-3-1。所有變化，都係圍繞住三個中後場球員：古迪利、尼安祖、馬卡奧。古迪利係防中鐵膽，時常收入中堅做後場傳。最近尼安祖受傷，森帕奧利就加更直接，用古迪利同馬卡奧拍住打雙中堅，排陣上更加直接壓前。
後場三人組穩定傳控根基，兩翼衛（阿古尼亞 / 泰利斯，拿華斯 / 蒙迪爾）負責側翼上落，前場就係拉美拿、伊斯高、蘇素、贊奴沙等等創造型球員嘅自由空間。有時因應對手，仲會將射手安尼斯利 / 杜堡放上正選。喺呢三組嘅框架之下，各組球員喺自己負責嘅區域都有更多嘅自由度。
佢係喺世界盃前嘅快車期走馬上任，三日一賽嘅賽程根本唔能夠練到啲乜嘢複雜嘅戰術出嚟，更遑論形成體系。但佢知道一個問題：以前盧帕迪古對自己戰術細節有好強硬嘅堅持，甚至去到固執嘅地步，佢麾下嘅西維爾冇辦法比新球員適應。而偏偏好似拉美拿、伊斯高呢類球員，都需要一定嘅自由度去發揮所長。
比起華倫西亞、切爾達等等同為西甲中游嘅競爭者，西維爾從來唔會將成績寄託喺單單一兩個主力球星身上，而係需要集體發揮去完成每一場比賽。隊內最高薪已經係週薪約€250k嘅老隊長拉傑迪，偏偏佢係球風相對低調嘅中場球員，而唔係主宰球隊所有攻勢嘅傳球核心。
西維爾雖然排名排好後，但佢哋從來不甘示弱，唔會因為自己低迷嘅處境，而夾硬採用唔適合自己嘅弱旅踢法。喺森柏奧利接手之後，唔期望西維爾能夠馬上喺聯賽上返去理想嘅水準。但歐霸呢條戰線，儼如西維爾嘅救贖之旅。