落地開花，富貴榮華
農曆新年就好多嘢小心，好似要記清各位長輩身分，千其唔好叫錯名，又或者要準備人哋問你拍拖未，結婚未，畢業未等等人生問題。不過咁多樣嘢最要小心嘅，就係初三赤口喇！我哋細細個已經聽過，赤口好容易同人口角爭執，為咗唔好新年就得罪人，就唔好去親友屋企拜年，留喺屋企抖抖就最完美。要嘈交嘅，點止赤口要小心？今日就等DailyView用網路大數據，同你回顧2019年五大網路YouTuber罵戰，等大家新年唔會做引戰狗喇！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
NO.5 白兵 VS Sunny（214筆）
起因：白兵講社會信用系統
香港社會時事批評，知識型YouTuber白兵，喺2019年呢個香港風氣雲湧嘅社會現況，佢成為好受歡迎嘅新進YouTuber，令好多香港人都可以對未來諗得更深遠。要數佢最受歡迎嘅影片，就喺2019年7月出嘅，有關中國監察「社會信用系統」嘅解釋。但係呢，Sunny無耐都出咗條片講呢個主題 ，白兵係直播期間，就似乎不點名嘅批評咗佢喎。
image source:
爭吵：Sunny都講社會信用系統
Sunny，原本好多網民都只係以為佢係「MK型YouTuber」，只係識講飲講食，拍吓日常生活挑戰咁。但喺2019年，佢開始轉變咗拍吓時事、社會題材嘅影片，甚至叫大家一齊去做選民，關心香港。佢亦都出咗片講中國監察「社會信用系統」，不過就慢咗白兵出片時間4日。有網民就係到諗，到底係咪拾人牙慧呢？亦都有人話，都係關心社會無所謂嘅。
image source:
NO.4 Catgirl VS 兩公婆食在香港（648筆）
起因：兩公婆五大指控
「兩公婆食在香港」，係由一對中年夫妻一齊經營嘅YouTube Channel，佢哋以飲食為題材，都累積咗唔少Fans！不過，佢哋2019年最受關注嘅事件，並唔係佢哋講飲講食，而係佢哋對另一位YouTuber CatGirl嘅五大指控。呢五大指控，包括「曾inbox以粗口罵Carman Ho」、「主動要求餐廳要求贊助同提供和牛」、「CatGirl生癬同傳染病」、「有精神病」同「呃錢攞綜援」。
image source:
爭吵：CatGirl理性正面澄清
香港知名飲食YouTuber CatGirl，一向以識飲識食知名，足跡遍及台灣、泰國等地，成日同好有愛嘅攝影師Ken拍4K片畀觀眾睇，製作相當認真！佢哋面對兩公婆五大指控，都無失控指罵對方，反而以長片回應對方嘅問題，用詳細嘅證據澄清五大指控都係錯誤。網民見到咁，九成九都力撐Catgirl，連Bob叔都出Post話兩公婆有問題，話點都會全力支持CatGirl！
image source:
NO.3 屎萊姆 VS 大J（876筆）
起因：大J反駁屎萊姆
2019年，香港網民對YouTuber 大J嘅評價，真係可謂直上神枱，成為最受香港後生仔歡迎嘅KOL。點解？皆因佢關心香港社會時事，周不時仲身體力行，為香港付出唔少血汗同心力。大J 早喺2019年頭已經直播打機時話同屎萊姆唔多熟，唔會同佢玩。佢仲反擊另一屎萊姆早前話YouTuber製作影片收入偏低，搞活動宣傳產品嫌疑咁喎！網民唔少都支持佢嘅睇法。
image source:
爭吵：屎萊姆長文回應
屎萊姆，喺2013年，喺YouTube開始上傳《神魔之塔》攻略影片開始知名，以打機為題材嘅影片，吸引咗唔少香港機迷Fans。2018年6月，佢仲正式簽約英皇娛樂為其經理人公司，做埋歌手。不過正所謂樹大招風，佢都受到唔少批評，尤其係大J 嘅言論。屎萊姆2019年12月就決定喺FB出長文回應，澄清返自己從冇呃錢，亦都有好多苦衷，底下好多網民都同情佢。
image source:
NO.2 Bob叔 VS 慕容公子（1305筆）
起因：慕容公子讀書冇用論
香港知名打機網路紅人，YouTuber 慕容公子，一向熱心喺直播打機時同觀眾吹吹水，風格相當風趣幽默。不過，慕容公子就曾經喺直播打機時，回應觀眾時講，讀書冇咩用，搵唔到大錢，有朋友做援交、倫敦金月入十幾萬。但喺大學生做野都係得萬幾蚊，讀書多根本只係「自high」，不如早啲出黎做youtuber搵錢仲好。網民聽到呢種言論，有同意，都有唔同意。
image source:
爭吵：Bob叔反對讀書冇用論
Bob叔，雖然同慕容公子都係香港當紅嘅YouTuber，但佢哋領域其實差好遠。皆因Bob叔片嘅題材，主要都係講飲講食，再加上出去玩上吓郵輪，最新仲多埋政治議題，都同直播打機相距好遠。但Bob叔見到慕容公子讀書冇用論呢番言論，就喺影片反駁，話讀書其實好有用，讀書唔一定只係為咗搵錢，仲關係人嘅眼界同修養。有唔少網民都力讚Bob叔有道理。
image source:
NO.1 達哥 VS 伍公子（2612筆）
起因：達朝滅亡事件
達哥，可以話喺全香港打機打到最出名嘅YouTuber。不過，佢喺2019年嘅運氣同遭遇就相當一般，6月收台唔再打機至今，一直都有網民質疑佢因為政治事件而封。因為呢件事，達哥仲喺FB大發雷霆，出Post話某些引起罵戰嘅係「引戰狗」，搞到唔少媒體都爭相報導呢件事。有網民話唔再做達哥Fans，亦都有唔少真兄弟依然支持，話等達哥早日再開返台。
image source:
爭吵：伍公子抽水改潮文
同達哥差唔多時期開台打機，另一位知名YouTuber 伍公子，2019年愈嚟愈受歡迎，周不時都講吓社會時事，一直關注相關事件。伍公子早喺2012年，已經同達哥嘅Fans有過爭執，話睇唔起佢哋太小學雞。今次引戰狗事件，伍公子亦都有喺FB出Post改潮文，暗諷某些KOL因為政治自我審查，最後仲用「開Post鬧引戰狗就代表勇囉」，網民就話佢一定話緊達哥！
image source:
【香港網路溫度計調查結果之圖文，未經授權請勿轉載、改寫】
分析說明：
本研究資料由《KEYPO大數據關鍵引擎》提供，分析時間範圍為2019年01月01日至2019年12月26日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『五大YouTuber罵戰事件』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。