尋秦記｜江華請古天樂食檸檬 網民集氣失敗

《尋秦記》電影版千呼萬喚始出來，由古天樂牽頭馬籌備多年，終於拍畢準備上映，日前更流出《尋秦記》預告片，網民期待以久的回憶返晒嚟，但卻議論紛紛為何主角之一的江華未有在電影中出現，大表失望。

撰文：東方新地 ｜ 圖片：東方新地

《尋秦記》預告片流出

《尋秦記》前年開拍，身兼老闆同主角的古天樂，為保留原劇神髓，親自召集原班人馬演出，當中林峯、宣萱、郭羨妮、滕麗名及雪兒全部歸隊，只欠劇中演大奸角連晉、嫪毒的江華冇影，原來江華一早請古仔食檸檬，表示無意二十年後再拍相同角色。係堅持定執著，真係見仁見智，不過就令費盡心思想拍好電影的古天樂大感無奈﹗

《尋秦記》堪稱穿越劇經典的，不止是古天樂離開無綫最後一部劇集，更加是他演技同事業同登高峰之作，幾年前古仔已經買下電視版權計劃開拍電影版，籌備多時終於落實19年下半年開拍，並在「影視娛樂博覽2019 」上，古仔就率領《尋秦記》一眾演員林峯、宣萱、郭羨妮、雪兒、滕麗名等原班人馬回歸，十九年後再聚首演出，一班演員都表現興奮。

《尋秦記》江華拒再做同一角色

《尋秦記》電影老闆古天樂更揚言：「要集齊人難過儲閃卡﹗」到底邊個令古仔咁感觸，咪係劇中演大奸角連晉、嫪毒的江華。據知情者透露：「江華好執著，佢唔想二十年之後仲拍番同一個角色，而且佢覺得既然當年已經咁經典，再演未必做得番嗰種神髓﹗」早前受訪江華亦表明立場唔會拍：「一部電視劇能夠成為觀眾心中嘅經典已經好勁，冇必要再重拍，更何況全部演員都已經老咗，喺商業角度睇係有追看性，但喺演員角度，究竟想表達啲咩﹗」

《尋秦記》三大主角再聚首

籌備多年的神劇《尋秦記》電影版終於落實開拍，老闆古天樂透露電影版會是十九年後的獨立故事，他和宣萱、林峯繼續擔任重頭角，雖然宣萱提議大家相處咗十九年，可否不用再講古文，卻被古仔即時 KO：「唔可以﹗」

古天樂堅持原班人馬

當年演出項少龍一角入型入格的古仔，對《尋秦記》有著深厚情意結，計劃開拍電影版，更是作為向他視為恩師的黃易(原著小說作者)致敬：「呢套劇可以話係穿越劇嘅始祖，而且故事布局精密，古仔對原著作者黃易好欽佩，不過17年黃易因病離世，令古仔好難過，覺得好遺憾對方唔能夠睇到電影版上映，亦令佢承諾會加緊籌拍，其實好多人都想參演《尋秦記》，但古仔就堅持用番原班人馬先夠傳神﹗所以全部台前幕後都係佢親自出面邀請。」

《尋秦記》背景是秦王統一六國

見解獨特的江華，其實可能真係諗多咗，事關古仔在記招上已透露，電影版故事獨立，絕不是重拍咁簡單：「故事發生喺十九年後，秦王都統一六國，後發生咩事冇人知道，好多創作空間，亦有唔少科幻元素，就算演員角色身份都可能有變，唯一同劇集有延續性，就係項少龍會有個19歲嘅仔，因為係講十九年後嘅故事，最大好處係大家都唔使刻意化老妝﹗」唔知聽完古仔咁講，江華會唔會改變主意，話晒原班人馬重聚合作，絕對係可一不可再﹗

江華單拖買外賣

淡出幕前的江華，早前一個人到九龍城買海南雞飯外賣。

keep住身形

雖然冇再拍劇，不過 58歲的江華身形仲 keep 得甚fit ，並冇發福更加冇肚腩！

急急走人

信主後的江華，近年愛在社交平台分享個人感受，不時更新「智語分享」，曾就在微博表示，唔會為賺生活費而隨便拍戲，相當有性格。

高質大仔無意入行

近年變得隱世的江華（原名陳木華），其26歲長子陳耀淙（ Bryan ）亦唔似一般星二代，對娛樂圈發展全冇興趣，反而考入公立醫院做救護員，疫情期間做過前線醫護，以救人為己任，相當有大志及愛心。