好快就到母親節，細細個返幼稚園開始老師就教大家DIY康乃馨送畀媽媽表達感恩之情，原來有唔少國家嘅人唔係送康乃馨㗎，不如一齊睇下今年搞咩新意思先！
幾時開始母親節開始送花呢？母親節起源於1908年，美國人Anna Marie Jarvis為離世嘅媽媽舉辦咗一個悼念會，並喺會上送上媽媽最愛嘅白色康乃馨，隨後佢致力推動送花活動，鼓勵大家向媽媽表達愛意，去到1914年當時總統Woodrow Wilson就將每年5月第二個星期日定為母親節。
母愛同春天及植物有唔少關聯，都係生命嘅代名詞。加上花除咗美麗，亦有純潔嘅意味，久而久之，大家都會選擇送美麗嘅花去表達對媽媽嘅愛同感恩之心。
康乃馨係好多地方嘅「母親之花」，因為佢代表熱情、魅力、真情同濃郁嘅親情，亦都有思念嘅意思。當中粉紅色康乃馨傳說指係聖母瑪利亞見到耶穌受難留下傷心嘅淚水，淚水滴在地上長出粉紅色康乃馨，所以粉紅康乃馨就有「不朽的母愛」嘅意思，亦都係最多人送嘅母親節花。
中國／台灣：金針花（萱草／忘憂草）
金針花有另一個名：忘憂草，花語係「忘憂及喜悅」。古代兒子遠行之前都會送畀媽媽，希望媽媽唔好太思念自己、忘記擔憂，祝福媽媽心境愉悅，因此以前多數都會送金針花。
日本：5花花束
每年10月第三個星期日係日本嘅母親節，日本人會送一札花，裡面包含凌霄花、僧鞋菊、櫻草、金錢花、冬青等5種花。呢札花唔單只色彩豐富，仲有「慈母的愛」嘅意義，代表媽媽撫育子女嘅青春、歡樂同幸福。
泰國：茉莉花
泰國母親節同其他地方唔同，定喺每年8月12日。而喺呢日，小朋友都會將茉莉花串成一串，雙手合十行跪拜媽媽禮，去表達對媽媽嘅感激。茉莉花純白、芬芳而且花期長，象徵母愛係何等高尚及永不停歇。
越南／印尼：玫瑰花
玫瑰花象徵「美麗與愛情」，唔少人告白都會送玫瑰花，而越南同印尼人送玫瑰花畀媽媽，其實都係同一意思，直接向媽媽表達愛意。
澳洲：菊花
菊花英文係Chrysanthemum，最後三個英文字母剛好係「mum」，即係媽媽，加上呢個時間係菊花盛開期，所以唔少澳洲人都會選擇送上菊花㗎。
今個母親節諗好送乜未呀？就算冇準備禮物，簡單一句「媽媽，多謝你」對媽媽嚟講都已經好感動㗎喇！
撰文：沙拉
