吳孟達安詳離世　周星馳：我無法接受！

資深藝人吳孟達病逝，終年69歲。田啟文於下午5時18分現身見傳媒，他受訪時說：「佢啱啱離世，好安詳，之前醫生畀啲藥都係令佢舒服，等佢瞓覺狀態走，好似瞓咗覺咁。（後事點安排？）會有治喪委員會，預計會搞追思會，有消息會公布。（通知咗周星馳未？）我啱啱知道死訊就即刻落嚟通知你哋。」他又譴責誤傳達哥死訊的人，不知道他們的消息來源及動機：「唔理佢哋係咪圈內人都好，但會影響到屋企人，唔知大家係咪好想達哥走，所以就即刻寫，我依家先係官方公布。」

田啟文於下午6時半離開醫院，並合十多謝大家。問到何時處理身後事？他謂：「未呀，畀大家靜一靜先，之後再約大殮點安排。」而吳的兒子及家人其後亦乘車離開。

吳孟達昔日的好拍檔周星馳，收到吳孟達死訊後表示：「剛剛已經得知這個消息，雖然這段時間一直在關注吳孟達的病情，多少會有一些心理準備，但還是非常難過悲痛，不捨得。吳孟達的病情來的快，走的急。他是我那麼多年的搭檔和老友，現時我還無法接受。」

吳孟達是無綫第3期藝員訓練班的學員，跟他同期的周潤發對其離世表示：「達哥一路好走！」另一同學鄧英敏希望對方安息：「如果個天要佢走，拖得太耐仲辛苦。」又指對方可跟老同學、已故導演林嶺東在天上見。他稱以前大家間中都有聚會，吳孟達每次都很客氣搶着埋單，又讚對方在藝訓班時是高材生。

早在《新紮師兄》系列中，跟吳孟達合作的任達華，稱對方為香港影迷製造了很多回憶，其獨特的演釋方式無人能及：「佢哋離世係演藝界損失，希望佢一路好走。」坦言大感傷痛及惋惜。

曾合作拍電影的楊千嬅表示捨不得：「佢嘅作品陪伴我們成長，佢係非常有才華同幽默感嘅前輩，有幸曾經喺電影上合作過。」

曾合作過多部作品的吳志雄認為最重要是對方走得安詳：「我知道佢情況唔樂觀，打算聽日由內地返香港探佢。（會唔會覺得遺憾？）都冇，生死好難講。」他稱兩人一直有保持聯絡：「一年前同佢喺西貢食過飯，當時問佢身體點，佢話ok，練緊拳術強身健體。」

黃一飛對於吳孟達離世表示：「如果受到病魔折磨的話，其實早啲走好過遲，我大過佢9年，最後都係一縷青煙，我都有番咁上下年紀，睇得好化。」

黃一山則大讚吳孟達是一位很隨和的人：「佢好好，拍戲都係想帶畀觀眾歡樂，希望大家記得佢，我都想返香港出席佢嘅喪禮，但因為要開工，未必可以做到，我知佢唔會介意，希望佢一路好走，將來再有機會（在天上）見面。」

去年曾與吳孟達合作陀飛輪腕錶的「港產陀飛輪」萬希泉創辦人沈慧林（William），對其死訊表示難過，他透露與對方認識了一段時間，不但有幸成為其合作夥伴，本身更是其影迷，他又憶述2人相處點滴：「我好記得嗰陣設計手錶之餘，亦會一齊研究馬經，估唔到依家天人永隔，我同屋企人都好傷心，希望達哥可以往生淨土、早登極樂，佢嘅作品會永留世間。」

藝人朱茵與吳孟達合作過多部電影，她表示得知對方離世的消息後非常難過，並大讚對方為人：「佢係非常好嘅演員，好值得人尊重，佢好識得照顧新人，當年我同佢合作時都係新人，又喺外地拍戲，每餐飯佢都會叫我同其他人一齊食，真係好唔捨得佢離開。」

至於曾與吳孟達合作電影《導火新聞線》的何珮瑜坦言兩人的對手戲不多，但他們在西安為電影宣傳的短短數日，令她印象深刻：「佢係一位好好嘅前輩同演員，佢好慈祥，佢會分享以前嘅故事，會講佢點去研究角色，佢講過喺《喜劇之王》中槍嗰場戲，佢教我好多嘢，嗰幾日宣傳獲益良多。」

而曾與他合作節目《王牌對王牌》的內地導演吳彤，大讚他「比年輕藝人都還要配合、謙遜、尊重一切內容。很敬業，一直沒說一句累」，又指：「讓我印象深刻的就是，我們叫他達叔，他說，別叫我達叔，叫我達哥，我還年輕着。」並為對方即使有病在身仍堅持演戲而感佩服。

苑瓊丹：佢教曉我做人

苑瓊丹對於吳孟達離世大嘆不捨，更表示在對方身上學到待人處世：「聽到大家發消息出嚟話達哥走咗，咁一定係好唔捨得啦，其實達哥喺我哋呢啲後輩嘅心目中，係一個非常之願意去幫助我哋呢啲後輩，亦都係教曉我哋去做人，我好記得同達哥開工嘅時候發生咗一件事，當時我火即刻嚟，但達哥就反而撳住我，叫我唔好咁，不如我哋做一次畀大家睇吓，一而再，再而三，叫我唔好忟，繼續試，所以喺我以後嘅日子裏面，無論做乜都好，當我想發脾氣時，我都會諗一諗，達哥曾經教我哋點樣待人處世，達哥離開我哋，不止係影壇好大嘅損失，亦都係我哋演藝嘅後輩，冇咗一個良師，亦都好多人冇咗個益友，希望佢屋企人可以釋懷。」

藝人薛家燕為節目《流行經典50》錄影，提到吳孟達離世，她感到唔安樂：「我知佢有段時間唔開心，仔女飛唔到嚟香港探佢，可能佢等緊仔女見佢，佢喺演藝界帶畀觀眾好多歡樂，演藝界又少咗一個有貢獻嘅人。」她說去年曾邀請吳孟達上節目：「達哥一口答應，佢當時喺馬來西亞，話等疫情過後就上節目。」她與吳孟達合作《食神》令觀眾留下深刻印象，但其實他們首次合作早在70年代，她說：「嗰時我同黎小田做導演套《狗咬狗骨》笑片，佢同繆騫人係一Pair，佢畀咗好多意見我哋，好多謝佢，佢度嘅笑位，係佢先做到，所以明白點解佢同周星馳咁夾。」

為悼念吳孟達逝世，無綫翡翠台下周一（3月1日）作節目調動，晚上11時55分第3線劇集時段將改播《永遠懷念 吳孟達：他來自江湖》。

東網網站 : https://on.cc/

東網Facebook專頁 : https://www.facebook.com/onccnews/