回顧林峯歷年8首街知巷聞歌曲 網民：首首都好洗腦！

話說日前林峯現身記者會，並宣布正式回歸TVB，兼會同星夢娛樂合作！換句話，林峯即將會重回TVB公仔箱外，更會主唱劇集主題曲，回想起過往，林峯唔止為多套TVB劇集獻唱，自己更有唔少名曲，不如依家一齊回顧下啦！

撰文：東方新地｜圖片：新傳媒圖片庫、微博、影片截圖

林峯 友情價回歸無綫

林峯相隔5年幾重返娘家，林峯話呢段時間喺街見到無綫公司車，都會上前望望有冇認識嘅舊同事，佢話今次係個好時機返TVB：「始終拍咗20多年戲，一直希望尋求突破同新嘗試，喺機緣巧合之下，杜之克搵我傾咗個project覺得好有興趣，詳情遲啲會公布！」林峯稱今次合作形式很自由，有計劃在2020年舉行大型演唱會，而今年會在內地及澳門做演唱會當作熱身。

問到會唔會好期待攞「視帝」？林峯話：「唔好嫌我老土，攞獎唔係最睇重，身為演員希望可以成功塑造更多令人記得嘅角色，我係要過戲癮嘅人，追求有新衝擊。(想唔想再攞「最受歡迎男歌星」？)畀當然要，哈哈！」

講到歌曲方面，星夢娛樂行政總裁何哲圖話其實上年已經同林峯嘅經理人傾開，覺得峯峯把聲好適合演繹TVB嘅電視劇，而且峯峯對歌曲演繹得非常之好，佢重返TVB合作係雙得益彰，都希望幫到林峯再創事業高峰！

林峯稱回歸無綫全因杜之克邀請，問杜之克話唔係自己嘅功勞：「靠隻古仔、靠個Project，其實關鍵係大家都覺得阿峯係時候做呢件事，我覺得係形勢，應該積極去試吓，我哋就搵咗個Project好啱佢，啲同事都花咗好多心機做一個好出色嘅人物，同佢傾咗一次古仔，佢都覺得係好好嘅時機去做。（個Project可唔可以透露多啲？）其實我可以透露聽日留心Filmark啦！（即係為佢度身訂造？）有好多嘢都要度身訂造。」

回顧林峯歷年8首街知巷聞歌曲

今次回歸TVB嘅林峯相信會帶嚟新音樂作品，雖然暫時未聽到新作品，但過往林峯就曾經主唱唔少歌曲都好好聽，依家就同大家一齊回顧有邊幾首耳熟能詳嘅歌曲啦！

｜記得忘記

林峯首次為TVB劇集唱嘅歌就係2002年《再生緣》片尾曲嘅《記得忘記》，當時呢首歌更收錄喺專輯《愛上主題曲3》入面！

｜愛在記憶中找你

5年後，林峯為劇集《歲月風雲》唱插曲《愛在記憶中找你》，當時呢首歌更成功令林峯獲得首個勁歌金曲優秀選得獎歌曲，相信唔少人至今都仲記得歌詞「如果可以恨你 全力痛恨你」！

｜愛不疚

2008年，林峯繼續為TVB唱劇集歌，當年除咗《溏心風暴之家好月圓》播出後爆紅外，就連劇集插曲《愛不疚》同樣hit爆，嗰句「放手 放開所有彼此更自由放手 其實我絕非愛得不夠 」唱得非常有感情之餘，試問又唱出咗幾多分手情侶嘅心聲？

而

｜幼稚完

2012年《幼稚完》係林峯主演劇集《雷霆掃毒》片尾曲，歌曲更收錄喺大碟《A Time 4 You》中，其中「幾千天近況幸福嗎 每日忙碌嗎」就唱出分手後戀人對前度嘅念念不忘。

｜我們很好

《我們很好》有國語及廣東話兩個版本，而國語版則係林峯首張國語專輯《First 第一次》嘅首支派台歌曲，國語版嘅MV就搵嚟佘詩曼做女主角，至於廣東話版本則搵咗湯怡，兩個版本同樣好聽，唔知你又鐘意聽邊個版本多啲呢？

｜如果時間來到

2009年時嘅《如果時間來到》係林峯第3張專輯《Let’s Get Wet》嘅主打歌之一，MV更搵嚟當時TVB力捧新晉女藝員徐淑敏做女主角！

｜Let’s get wet

講到《Let’s Get Wet》呢張個人專輯，當然唔少得同名歌《Let’s Get Wet》啦！當年林峯更以呢首歌嘅歌名做自己首個紅館個人演唱會嘅名，絕對可以話係林峯歌唱事業嘅一個標記！至於個MV就有陳茵媺一齊拍攝，配合歌詞二人更一齊跳貼身舞！

｜Chok

2011年，《Chok》呢首歌真係播到街知巷聞，成首洗腦歌咁！不過，就算有人唔記得大部分歌詞，但都一定記得個「chok」字！呢首歌更為林峯於當年獲得唔少獎項，包括《十大勁歌金曲頒獎典禮》「金曲金獎」，為同年奪「亞太區最受歡迎香港男歌星」及「金曲金獎」男歌手。

即時回顧：

新歡張馨月得寵示威 林峯拒吳千語𢱑翻撻

去年三月林峯宣布與吳千語早已分手，千語被爆與前全國政協施子青長孫施伯雄(Brian)拍拖，林峯亦戀上國內34D索模張馨月。張馨月近月更高調在社交網晒奢華無憂生活，得寵示威。吳千語因未被有米男友認愛，焗住把戀情低調，日前25歲生日男友都係冇影。最近千語更在網上流露無奈和後悔之意，被指唔捨得相戀五載的林峯。悔不當初𢱑翻撻冇咁易，林峯堅決拒回頭！

吳千語：完全放下實在不容易

而身為女主角的吳千語亦喺社交網亦承認分手一事，佢留言：「感謝各界朋友短訊關心和支持，請原諒我選擇以社交平台作一次性的回應。五年間全心全意投入的感情，要完全放下實在不容易，大家請給我空間適應，未來我會勇敢面對。希望今後大家會繼續給我支持，並多留意我的工作。」

張馨月得寵

曾經被林峯捧在掌心愛錫，要風得風要雨得雨的吳千語，隨著去年暗交前全國政協施子清長孫施伯雄，與林峯的五年情終畫上句號。今年三月，林峯被影到與27歲的內地索模張馨月同遊海洋公園，戀情曝光後二人繼續穩定發展，相比吳千語，同樣被林峯寵愛的張馨月更加識做人，就連林峯的家人及身邊朋友都對她讚不絕口。

舊愛不如新歡

據知情者透露，吳千語個性自我，擺出嚟個樣已經係寸，同林峯拍拖時只想獨霸男友，唔想應酬其他人。相反張馨月長袖善舞，好識氹人，唔會成日黐身，畀好多私人空間男友；但見面時又會小鳥依人，性格同千語差天共地。所以據知林峯好早已經帶佢出嚟見人，張馨月同個個都有話題，好順得人。

堂妹契姐成閨密

唔止堂妹林夏薇、就連好友楊怡同契姐周勵淇都好鍾意張馨月，嚟香港時都會一齊行街食飯。拍拖一年，二人感情一日千里，今年初農曆新年，林峯帶張馨月返廈門過年見家人，二月林峯要留港繼續趕拍網劇《 PTU機動部隊》，張馨月為更靠近男友更專登留港陪開工。

林峯亦融入女家

林峯亦早已經融入張馨月家中，今年9月張馨月胞弟在江蘇鹽城娶老婆，林峯都有現身婚禮，接新娘時林峯在新房企埋一邊笑晒口㖭！更被po出與一對新人的合照，關係咁好大有機會一家親。

進駐林宅晒Body

女友千依百順，林峯當然不會待薄另一半，之前與吳千語拍拖時有求必應，對張馨月一樣寵愛有加。在張馨月的社交網可見，與林峯拍拖後的她生活悠閒又奢華，一身名牌、手袋盡顯衣食無憂，暑假期間更著三點式在林峯帝景園寓所的私人泳池晒身材，與吳千語早年唔使做的闊太生活如倒模一樣。

林峯開心會友

林峯 － 倒模七愛方程式：

林峯每次拍拖都善待女友，每個都享受公主一樣的生活，與吳千語一樣，與林峯拍拖後的張馨月，工作量少之又少，但經常周遊列國。

吳千語增肥出山搵食

相反，過去五年掛住拍拖唔憂做的吳千語近年就要靠自己，今年開始再活躍幕前。據知情者透露，吳千語同林峯拍拖時瘦到好似火柴人咁，好多客都嫌佢太瘦，依家肥番長肉唔同晒，著衫都靚啲。感情事好難講，始終現時男友都未肯公開承認拍拖，所以千語都要為自己打算，放風想接多啲嘢做。

林峯拒吳千語𢱑翻撻

吳千語以前畀林峯當女皇捧上天，依家要偷偷摸摸又冇名份，有比較之下當然冇咁開心。不過就算千語有幾後悔、有幾想翻撻都冇用，因為據悉林峯對佢已經完全心死，依家同張馨月 一齊不知幾舒服，唔會再受千語氹！

千語後悔甩拖

早前吳千語25歲生日，在橫店拍戲一個月的她與助手及大班好朋友一齊慶祝，雖然不見男友施伯雄在身邊，但收到五個蛋糕，收穫非常豐富。吳千語又不時在社交網轉帖有關愛情的文章，早前她在微博對一篇寫舊愛的文章讚好，被指不知不覺流露出對林峯的念念不忘。

失去才懂珍惜

吳千語在微博對一篇寫舊愛的文章讚好，文中提到「就好像我喜歡你的時候你不喜歡我，你喜歡我的時候我身邊已經有別人了。我對你好的時候你不珍惜，等你回過頭來後悔的時候我已經被別人寵成小公主了 …… 錯過一個人，只需要一秒，就夠了。我錯過你了，你也錯過最好的我了。」不少網民看到即猜測她對林峯的戀情有所感慨，仍未放得低。吳千語依家先知林峯好？怪就怪自己身在福中不知福，將林太之位拱手讓人。

新歡未認愛

有指吳千語移情身家過百億的「富三代 」施伯雄(Brian)，但上月27日生日的她，男友卻冇影，只獲一班好友與她慶生，其中一張切蛋糕相更在片場影。新歡有米有家底，吳千語未被承認女友身份，雖然早前被踢爆與Brian蜜遊歐洲，仲配合男友慳家性格，坐經濟機位返香港，但她一日未有名份亦唔敢高調，更焗住收斂愛晒命性格。

早前千語罕有地在IG作出澄清，貼咗一張滿身名牌嘅相片後留言：「#包包品牌送 #房子自己租 #別亂寫啦。」但繼續被網民抨擊解釋都冇用，搞到吳千語嬲豬索性連個post都刪除埋，只剩下靚相。