iOS 13，正爆功能
Apple喺香港時間9月20號釋出咗iOS 13嘅正式版，吸引咗好多人即刻更新，搶先試用新功能！而DailyView今日就根據今次Apple開新功能用網路大數據做咗個調查。最受歡迎嘅第一名非深色模式莫屬喇，可以慳到電之餘，好多app都可以變成全黑，例如Instagram，令到好多果粉都即刻搶住update啊！而第二則係Memoji，可以自己D.I.Y專屬你嘅表情符號，依家網民已經可以玩到出神入化㗎喇，你跟上未呢？第三，「捷徑」app亦已經變成內置app，用家喺桌面一按就用到，仲支援多步動作設定。第四，音量調節顯示改善咗，由本身側邊直線顯示，變做頂部顯示，更加方便用戶睇到變化。最後，新加嘅影片剪輯嘅功能，功能同相片編輯一樣，仲可以旋轉影片瀏覽方向，勁方便！
每次都急住更新，但更新完都令到你後悔？
正所謂針無兩頭利，今次Apple嘅大型更新，由iOS 12 update 到iOS 13，當然都會伴隨唔少用家反映更新嘅問題。今時今日，如果你仲未正式走入iOS 13嘅潮流尖端，好可能你都擔心緊更新嘅iPhone危機，仲觀察緊用家情況。不過大家講法都好唔同，有人話根本無事好快好順，快快手更新；又有人講，更新完之後部機Lag到用唔到。到底現實係點樣呢？空穴來風，未必無因。DailyView今次就用網路大數據調查咗10大每次更新iOS會令人崩潰嘅事，你今次更新完又有冇共鳴呢？
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
10 舊App不被支援（137筆）
——可能要刪咗佢喇
Apple今次由由iOS 12 update到iOS 13，真係一個史上系統嘅大更新，改變咗原本iOS 12好多地方。而喺眾多更新問題之中，有一件事其實係同iOS 13並無關係，認真無奈。皆因不論咩系統嘅大型更新，好似由window 7到window 8咁，就會有好多原本同舊系統相容嘅軟體發生問題，即係話，新嘅系統已經唔再支援已經無再更新嘅軟體。iOS 13都一樣，可能唔少用家平時用開嘅舊App，可能已經不再被iOS 13支援，更甚者App開發者都無再打算更新，呢個問題真係無得解決。
image source:
9 更新失敗（163筆）
——令人崩潰嘅白蘋果
Apple更新失敗，好容易會卡住，進入俗稱「白蘋果」嘅現象。所謂「白蘋果」現象，即係當iOS系統出現軟、硬體嘅故障，卡住咗喺一個類似於啟動畫面，無法正常進入手機系統，無法使用手機，以及任何操作嘅一種奇妙狀態。再直接咁講，即係部手機死咗機。雖然網路上好多文章都有提供「白蘋果」嘅方法，但相信各種方法都未必咁順利成功，好可能要用戶自己去實體店搵幫手。為咗一次更新，要花咁多時間，同埋擔心嘅精力，似乎就相當無奈，大家記住要小心唔好中斷更新。
image source:
8 Face／Touch ID無法使用（179筆）
——次次都要打密碼
Apple自從推出咗Face ID解鎖功能，一直致力改善面部解鎖嘅應用功能，而今次iOS 13 就話會令Face ID臉部解鎖速度提升30%，真係快過用Touch ID。話時話，Apple呢兩個功能，真係走得好前，亦都好方便用家使用，絕對係領先各大手機嘅實力表現。不過呢，又有用家表示，話更新咗iOS 13之後來，無論Touch ID又好，Face ID都好，兩者都用唔到。結果要次次都用密碼開手機，咁煩仲點樣有生活態度先？iPhone無咗呢兩種功能，已經唔係一部iPhone喇！
image source:
7 係咁Lag機（258筆）
——每三秒卡一秒
iPhone最優勝其他手機嘅地方係邊？三個字，順暢囉。好多iPhone愛好者都話，用得iPhone，就唔怕佢會Lag機。皆因用得耐用得多咩咩咩各種原因，令到部機Lag咗，慢咗，成日輕機，都唔會喺iPhone出現。可惜嘅係，有唔少用家都講，更新咗之後部機竟然Lag過未更新之前，今次真係中伏喇！唔係話，今次更新咗之後，部iPhone理應快過之前？有網民講笑咁話，而家每三秒卡一秒，真去返以前啱啱有智能手機咁。56K以前就夠用，而家用開咗4G，仲點樣忍受返咁慢嘅手機？
image source:
6 來電無咗鈴聲（272筆）
——手機形同滅聲
香港人怕講錯嘢，唔出聲，就成日都有，點估到手機更新咗之後，都識自我審查，無咗來電鈴聲喎！iPhone更新上咗iOS 13，就有用戶表示，話人哋打電來過嚟，已經再聽唔到電話聆聲喇。唔係搞咗靜音，而係系統自動熄咗來電鈴聲。哇，香港人好多都分分鐘幾百萬上落，一個唔小心因為無咗來電聆聲，聽唔到一個重要嘅電話，損失嘅可以成千上萬咁計。又有好多媽媽級用家，放咗部手機入手袋，無聆聲嘅話，真係隨時聽唔到阿仔阿女嘅電話，呢種情況，影響真係可大可小。
image source:
5 彈App（331筆）
——最後關頭先彈App
講到當今低頭族最憎遇到嘅手機故障，相信莫過於彈App喇！皆因彈App代表住嘅，係用戶之前所花嘅心血，可能白白浪費，真係存檔都死清光！好似你開咗App出嚟打筆記，啱啱記低咗自己諗到咁發達大計，諗住今次實可以谷底翻身喇。點知彈咗App，咩都無哂。或者唔好講到咁遠，單係你玩緊一隻緊張刺激嘅手機Game，正當你同對手打到最後一分一秒，眼見自己已經差唔多勝出之際，突然就彈咗App。當你再開返隻Game，見到自己輸咗，呢種心痛，真係令人崩潰。
image source:
4 無法連上4G／WIFI（428筆）
——同舊磚有咩分別？
智能手機最驚發生咩事？就係智能手機，無哂智能囉！咁點解一部智能手機會無哂智能先？最直接嘅答案，係因為呢部手機上唔到網！有iPhone用戶話更新咗iOS13之後，竟然連唔上網路，部手機九成嘅功能即刻廢咗。大佬，今時今日手機主要已經唔係用嚟打電話。上網、吹水、煲劇、打機等等，有邊樣嘢唔需要用到網路？有網民話，上唔到網嘅iPhone，同舊磚根本無任何分別。現代人嘅食物金字塔，已經由食物變咗做網路，無得隨時隨地上網，對好多人嚟講真係慘過死。
image source:
3 速度變慢（599筆）
——認真慢過蝸牛
當我睇嘢愈嚟愈慢，我就知道自己其實愈嚟愈快。唔講，好多iPhone用戶都以為自己係《頭文字D》入面主角，皆因佢哋好多人都話，自從更新咗iOS 13之後，自己睇嘢就開始愈嚟愈慢。咁當然唔係因為佢哋愈嚟愈快喇，而係因為佢哋手上部iPhone真係變慢咗唔少，連打個WhatsApp，打幾個字，可能都要用上比之一倍以上嘅時間。人呢，由慢入快就好開心嘅，但當由快變返慢，就好難習慣。香港人，咩都講個快字，咩都要有效率，咁慢嘅手機，隨時忍唔住整爆佢。
image source:
2 iPhone發熱（804筆）
——熱到死埋機
好多iPhone用戶好相信自己部機嘅效能，同時開住好多App使用，又可能播埋歌，玩住高畫質嘅手機遊戲，隨時會令到部手機發熱。iPhone用得耐，開咁多嘢，部手機熱過平時，都好正常。不過，你有冇諗過，部iPhone正常嘅使用，都隨時會熱過未更新之前？好多用戶都反映，話iPhone更新咗之後，熱到燙手，甚至熱到部iPhone話彈咗個畫面出嚟，話要休息吓先可以再用。以前就有人講「燙手山芋」，今時今日，可能就要轉個講法，變做「燙手iPhone」喇！
image source:
1 iPhone耗電快（849筆）
——2分鐘掉1%
今次iPhone用戶更新iOS 13最大嘅不滿，就係更新完之後，功能的確係好過之前，但係呢，耗電嘅速度快過之前好多！一部機再勁，但佢唔持久，又有咩用呢？而家出門口，部智能手機隨時要連續咁用四、五粒鐘，無論喺等車、坐車、返學上堂、返工偷懶、瞓唔著開住手機上網等等，都講求部機用得耐。唔通部機咁鬼廢，要隨時隨地都成日插住個尿袋咁用咩？尿袋第一重，第二唔方便，第三唔型。用得iPhone，就有瀟灑嘅生活態度。耗電咁快，拖泥帶水，仲點樣叫做iPhone用家？
image source:
分析說明：
本研究資料由《KEYPO大數據關鍵引擎》提供，分析時間範圍為2019年07月24日至2019年10月21日、2019年04月26日至2019年10月22日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『iOS 13新功能』、『10大更新iOS系統令人崩潰嘅事』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。