【搵食CONY】中日韓泰越涼拌醬汁靈魂　煮出不同風味開胃菜

涼拌菜式做法容易，花款又多，在天時暑熱容易食慾不振嘅情況，不妨試下在家製作！其實有唔少亞洲地區都有自己特色嘅涼拌菜，而且每種都總會有一些必落元素，CONY而家就為大家解構各地涼拌醬汁，等你可以輕易做出不同風味嘅涼拌菜式啦！

中式涼拌──黑醋及蒜

首先必講嘅當然係中式涼拌。中式涼拌離不開用醋和蒜，再因應個人口味加入醬油、糖、辣椒、蔥或芫茜等，帶來不同層次的酸勁。至於醋有好多種，基本上白醋會用嚟醃漬，同埋唔想影響食材本身嘅顏色就會用，而陳醋及香醋嘅酸味加熱後會容易揮發，所以比較適宜涼拌。佢哋嘅味道冇白醋咁酸，但就有種濃厚感覺，而且別具層次。至於蒜就係令菜式更加惹味，都係必落嘅配料。

越泰涼拌──魚露及檸檬汁

夏日熱辣辣，酸辣開胃嘅越泰風味美食就最受歡迎。相比起其他亞洲地區，越泰式涼拌嘅酸味唔係來自醋，而係青檸或檸檬，另一樣必落嘅當然係魚露，而泰國人比越南人嗜辣，多數會加埋辣椒，形成層次豐富，集鹹、鮮、酸、辣的獨特風味。

韓式涼拌──麻油及芝麻

在韓國餐桌上經常看到各式各樣的涼菜，韓國人不會餐餐開爐頭煮飯食，反而習慣預先弄好一堆涼菜放在雪櫃保存，隨時攞出嚟食。而喺過百款韓式涼菜中，你會見到不同口味，或加入辣醬、大醬、醋等調味，但要數到最不可缺少嘅元素，必定係麻油及芝麻，以獨特香氣昇華菜式的味道。

日式涼拌──味醂及醬油

日式料理中亦有多款涼拌菜和漬物作常備菜。漬物方面離不開用上醋，至於涼拌方面，就必備味醂及醬油，再根據個人口味加入鹽、糖、芝麻、蔥等就完成。日式涼拌菜的味道因為加入味醂會比較香甜。而日式醬油的口味眾多，例如昆布醬油、鰹魚醬油、香菇醬油等，同樣可以根據口味及食材配搭而挑選。