【咁大鑊】疑涉及學員潛水遇溺意外  陳鍵鋒未有公開解畫搬竇住酒店避靜

上月生日，啱啱43歲嘅前TVB小生陳鍵鋒（Sammul）疑涉及一宗學員潛水遇溺意外。早前自爆有腦血管遺傳病，被迫中斷演藝工作的陳鍵鋒，近年將興趣轉化為職業，成功考獲潛水牌及急救牌照後，用咗5年時間當上潛水教練，他更提供私人教授服務。而本月6日，一名中年男子於西貢跟教練一對一學習潛水時，疑因遇溺失去意識，被女途人發現報警，昏迷送院不治。有傳遇溺喪生學員的潛水教練為陳鍵鋒。
 
雖然未清楚事發狀況，但卻惹來網民熱話，奇怪單對單教授，為何教練會先上岸？點解唔同溺斃學員急救，直至有救護車到場？當時佢去咗邊？就學員潛水溺斃意外，陳鍵鋒及其經理人周坤燃(Ivy)未有回應，但昨日有傳媒影到Sammul獨自拖著巨型行李箱離開何文田住所，上咗預先call咗嘅的士，搬竇到灣仔一間五星級酒店「staycation」避靜，他被追訪時不發一言，未有就傳言解畫。其後經理人表示無可奉告。
 
陳鍵鋒DJ出身，1999年加入TVB，拍完劇集《律政新人王》上位，後來喺《衝上雲霄》與馬國明、黃宗澤及吳卓羲合組「S4」爆紅受無綫力捧，其後北上發展賺「人仔」，吸金力強，2010年陳鍵鋒與林心如主演嘅古裝劇《美人心計》更一炮而紅，被內地網民封為「史上最帥皇帝」。而他的性取向一直存疑，至今還是單身，未見有成家立室打算。