90後一定有共鳴！許留山由一杯芒椰奶西見證時代

約邊？許留山見啦～

香港人食完飯去食返碗糖水或者甜品，呢個習慣都可以算係香港獨有嘅文化之一，所以糖水舖開到周街都係，台式飲品、甜品呢幾年特別受大家歡迎，不過講到香港人嘅糖水舖，許留山都算得上係大家其中一個集體回憶。放學去，放假又去，當時唔興去cafe扮文青，唔少學生就係去許留山叫個甜品，坐喺嗰到吹水hea時間。如果嗰時無食過許留山，真係好out㗎！ 當然，時移勢易，依家後生仔一早就唔再流行去許留山啦。
今日DailyView用《KEYPO大數據關鍵引擎》分析咗網民討論許留山嘅網路大數據，許留山上年喺Facebook搞嘅抽獎活動掀起一波討論熱度，吸引咗好多人留言熱烈參與，而另一個最高峰就係近日傳出面臨結業嘅消息。因為被清盤而令許留山即將成為一代香港人嘅回憶，其實今年一月開始許留山已經陸續有十幾間舖執咗，今日走到呢一步，早就有跡可尋呀。

「拍拖」必食嘅甜蜜之選

拍拖活動離唔開行街、睇戲、食飯，糖水直落，兩個人一齊食返碗甜蜜蜜糖水，為拍拖日畫上一個完美嘅句號。唔少人拍拖都去過許留山食嘢，如果段感情有好結果，每次舊地重遊，都會諗返起過去甜蜜嘅回憶，但如果係一個遺憾收場，今日見到許留山成為歷史，會唔會令你諗返起當年同你一齊食一碗甜品嘅嗰個人呢？

image source:Facebook/ 許留山

「可惜」天下無不散之筵席

許留山以前被稱為喺香港必食嘅芒果甜品店，唔少商品帶起熱潮，成為港式甜品店嘅代表之一，好受遊客歡迎，仲曾經兩度喺台灣開設分店。一代經典甜品店今日要清盤都幾可惜，由專為香港人打造嘅甜品店，後尾慢慢演變成專做遊客生意咁滯嘅舖頭，喺時代嘅巨輪之下，同大家講byebye，呢個都係無可避免嘅結果。

image source:Facebook / 陳艾熙 Amber Chen

90後「回憶」中嘅味道

屬於咁多香港人嘅集體回憶，今日即將面臨結業，可能唔少人都覺得好唔捨得。之不過俗語有云：「天下無不散之筵席」，每一個時代都有屬於嗰個時代嘅人事物，所謂「舊嘅唔去新嘅又點來呢」，而家最受歡迎嘅糖水舖，可能過多10年亦都會被淘汰，記住過去嘅美好之餘，都要繼續向前看，努力面對未知嘅將來～

image source:Facebook/Cookie Run 跑跑薑餅人香港站許留山——芒果界嘅代言人

提起詠春你會諗起葉問，講到芒果？就一定諗起許留山！講起許留山，一系列用芒果做招牌嘅甜品就即刻喺腦海浮出， 當年推出芒果西米撈之後大受歡迎，多芒小丸子、芒之戀、多芒西米露，多芒撈河等等。啖啖芒果加上許留山自家製小丸子同埋椰汁河粉等嘅配料成功打造出多種王牌甜品，甚至可以話係諗起芒果就會諗起許留山。咁多種產品入面，唔知邊一款係你心目中最經典嘅甜品呢？我哋仲幫大家用咗網路大數據調查咗許留山以下兩種網路熱度最高嘅產品，你又有冇食過呢？
image source：FB / 許留山

芒椰奶西（網路熱度：493筆）

許留山經典飲品「芒椰奶西」，入面有椰汁、芒果汁、芒果粒同埋西米，做成杯裝令大家隨時隨地都可以飲得到，唔需要坐低都可以嘆西米露，夠晒方便。雖然一般定價都唔算平，不過有時會員限定優惠價10幾蚊就飲得到。呢款簡單又穩陣嘅甜品，相信可以滿足到絕大部份人嘅口味。

image source:Facebook/ 許留山

芒椰蘆薈爽（網路熱度：220筆）

「芒椰蘆薈爽」一聽就知道，飲品嘅基底仍然係招牌芒果果肉同芒果汁加椰汁，另外加入咗女士好鍾意嘅蘆薈，熱量低又健康之餘，口感上亦都更加豐富，所以一直都係手調飲品入面嘅王牌產品。冰凍嘅芒果加上椰汁，配上粒粒蘆薈，喺夏天飲特別消暑解渴，好受大家歡迎。

image source:Facebook/ 許留山

許留山陪伴我們成長

Twins—友誼第一

「讓我們結伴探訪許留山～感情不必分你高班我低班～」唔知大家對呢句歌詞有冇印象呢？Twins呢個組合都係好多香港人嘅童年回憶，小編細個嗰時幾乎全部同學偶像都係Twins。佢哋同許留山就好似係嗰個年代入面長大嘅人擁有嘅共同回憶，今日許留山要結業，而香港樂壇都早就換咗幾批嘅人。呢首歌眨吓眼已經係十幾年前嘅歌，相信經歷過嗰個年代嘅人對於許留山結業，都會對於呢種「改朝換代」特別有感觸。

他約我去許留山

當年一首《他約我去迪士尼》紅遍香港嘅網絡原創曲唱到街知巷聞，創作者Kellyjackie就係特別為當時即將開幕嘅迪士尼寫咗個首歌。而2011年有網民為咗表達對許留山嘅「愛意」，特別改編咗呢首歌，由去迪士尼改為去許留山。改編版入面提及多種許留山嘅甜品，歌詞搞鬼之餘亦都非常貼地，夠曬香港本土味，相信香港人聽到都會會心微笑。唔知呢首會唔會係第一首因為糖水舖而寫嘅歌呢 ？

【香港網路溫度計調查結果之圖文，未經授權請勿轉載、改寫】

分析說明：

本研究資料由《KEYPO大數據關鍵引擎》提供，分析時間範圍為2019年03月20日至2020年03月18日。

網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『許留山/許留山清盤』相關文本進行分析，並根據網友就該議題之討論，作為本分析依據。

本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。