「必達跑會」屹立至今四十五年，主教練仇季新 (人稱Sunny Sir) 乃初代加入之成員。
前輩級跑手俾人感覺向以硬淨剛烈兼略帶固執見稱，事前一直抱著戰戰競競，少講少錯為上策嘅心情到來拍攝，怎料Sunny Sir平易近人，談吐不慍不火兼帶點風趣，鬆一口氣 ! 更估佢唔到嘅係「必達跑會」縱歷史悠久，拍攝當日竟發現有不少年青學員，還言談甚歡，眼鏡碎片一地都係。兩位被提拔嘅助教 – 邦師兄及Wing師姐，更年青得像威化般乾脆，看上像極高中生，再一次暴露咗我嘅膚淺…..
呢集最深刻嘅係，訪談中 Sunny sir 娓娓道出年青時候嘅佢哋如何刻苦訓練，那個連 intervals、tempo、LSD 概念都未於本地跑壇出現、自己跑緊咩披醒都無從得知嘅年代，所謂 elite 或 sub 3 跑手到底是如何練成? 完全超出我想像。連 social run 呢個詞還未出世嘅7、80年代，莫講話馬拉松，跑步呢回事於本地僅屬小眾活動，甚至只屬精英專項。再加上當時並沒所謂正規跑步教練，想學就只能跟隨當時嘅英軍一同訓練，說穿了其實係從旁偷師，人做乜你做乜。
嚟到2024年，科技發展速度連 sub 2 跑手也跟不上，一隻智能手錶已幾乎能充當跑手們嘅私人助教，各項資料數據分析多到要睇幾日；各大品牌嘅super shoes對對都話有助推快幾秒；網上資訊泛濫，只需輸入「跑步」二字，視頻短片文獻之量直逼中央圖書館，死未?! 但回想7、80年代嘅跑手們，著嘅係體育堂PE衫(極有可能同時係瞓覺嗰件)；腳踏青蜒牌白飯魚(唔知咩係白飯魚嘅你可問吓 daddy)；錶你有無? 嗰個時代戴隻價值過百嘅電子膠錶已經威過威士忌……無任何數據資料統計，配速? 披醒? 課表? 尤如外星密碼，處於簡約至極嘅舊時代仍能成為精英跑手委實談何容易，想必比現在艱巨百倍，斗膽講句，佢哋先係真正嘅elite!
縱使自己絕對談不上屬典型裝備L，但當下嘅商業消費世界，尤以呢幾年，跑步熱潮突如洪水般湧至，連帶周邊相關產品也頓時五花八門琳瑯滿目，買唔晒睇唔完忍唔住，未學行先學跑，唔跑得都要睇得幾乎係通識。偶遇過不少前輩級跑手，大多擁抱昔日美好時光，對時下科技潮流嗤之以鼻，反觀海納百川嘅Sunny Sir不單沒被時代巨輪所吞噬，還對時下跑界熱議瞭如指掌，由當今跑界科技趨向及至跑鞋熱潮走勢，盡在掌握與時並進，且跟學員們如數家珍般滔滔不絕，我等只得三腳貓功夫嘅嘍囉，能不脫帽致敬嗎?
The post 尋找跑會的故事 #10 | 必達跑會．不老之火 appeared first on Fitz 運動平台.