ViuTV選秀節目《全民造星V》成為全城熱話，其中19歲參賽者王天宇就因態度問題而受到網民熱議，他在首回合遭評判Edward搣燈而落入復活區，後來竟出現怒罵評判的情況！而負評連連下他又再被網民揭出黑材料，原來向來燥底的他曾怒鬧街頭表演者？又公然侮辱同性戀人士？
19歲參賽者王天宇鬧評判滅燈惹網民怒插
《全民造星V》的參賽者話題多多，而本身是Busking的38號王天宇在面試後順利入圍，但入圍後在為節目團歌《前傳》MV排舞時就經常遲到，其中一次更以病為由缺席，但就被工作人員發現王天宇當晚竟然出旺角街頭Busking。當場被踢爆講大話的王天宇就解釋指：「我可能係夜晚出咗去，不過我朝早就起唔到身。我唔係去咗Busking，我係出咗去，跟住食咗個飯，我係經過跟住就唱咗一兩首。」
另外他亦無視綵排演出分半鐘的要求，一直表演到三分鐘才被叫停，在首回合正式出場前，經已有幕後同事形容王天宇「好難搞」。
而到了正式表演唱普通話歌《畢竟深愛過》時，表現不俗的王天宇先後獲評判陳詠燊及Edward Chan給予藍燈，原本可以可直接晉身60強。但直至表演完畢，Edward Chan表明他這盞藍燈是有條件，並要求天宇以唱副歌的方式再唱主歌部分，如果表現不達標就會收回藍燈。結果王天宇真的不達標，Edward收起藍燈令他由晉身60強變成落入復活區。而搣燈後Edward也有解釋原因：「我好想聽一個好清楚咬字嘅主歌，但你始終都係唔肯打開個口唱歌，我tips已經俾得好出。你本身聲底有特質，如果可以好好發揮係會好好聽，不過好可惜，成個表演未能呈現到喺觀眾面前。」
離開舞台後，來到淘汰區的王天宇接受後台訪問，明言對被收燈感到憤怒︰「我已經按照佢要求改變唱腔，佢照熄燈，我好嬲。我不覺得我咬字有問題，因為普通話、國語係我母語。我講普通話一定多過佢講白話……我自問，我實力唔會差過某啲60強選手。」而又有畫面所見他背向鏡頭站著，並做出一個左手由下而上揈起的動作，疑似洩憤的手勢相當耐人尋味。
不過王天宇的態度已引起眾怒，網民湧入其IG洗版指摘批評他態度差、愛搵藉口掩飾，而王天宇面對大量批評後，竟然在其telegram群組中貼出與Edward的對話紀錄，證明自己已即時向Edward道歉。但此舉再次引起眾怒，網民直指他未得Edward同意下公開對話內容。
後來王天宇凌晨在IG story道歉，還配上許廷鏗的《青春頌》的歌詞：「對不起，曾經的我是一個不折不扣的壞人。而我將會用餘下嘅時間重新出發。」
王天宇曾被揭黑材料 燥底怒鬧街頭表演者？
事實上，當王天宇入圍《全民造星V》95強時已被網民起底，有片段表示於2021年7月，一名疑似王天宇的男子，穿著藍色日本餐廳工作服，在在旺角豉油街位置不斷用粗口挑釁街頭表演者Oliver Ma（馬賦馳）。「影我做乜X？我企喺度聽歌唔得呀？」、「你再唔唱打你㗎啦！」，當中王天宇部分言論更影射同性戀者嘔心：「你個樣成個女人咁呀，好難睇呀你個樣！」、「你好X Gay呀，X街，X你老X。」令網民一早對他有爭議。而他亦在節目播出後，在粉絲群組上便發文，表示自己知衰，希望大家盡情鬧自己。