張慧儀近日接受鍾慧冰網上頻道節目訪問，談到當年拍攝《真情》時戀上盧慶輝，她回想當年未對盧慶輝有感覺時，完全不覺得他靚仔，亦曾斷言兩人絕不可能拍拖，豈料後來有天突然「叮一聲就着咗」。張慧儀說︰「有心人不斷同你獻吓殷勤。我嗰時好忙，有一次身體唔舒服入咗醫院，就係咁樣開始。」
廣告（請繼續閱讀本文）
談到兩人當年拍拖約一年就分手，張慧儀爆當年是「被分手」︰「我係被分手﹗太多嘢已經過咗去，只不過當時我仲係好記得我係被分手，對我嚟講打擊好大﹗我記得當日喺影樓影緊相，嗰時仲用緊傳呼機，我影完相，全港傳媒call到我爆機。啲人同我講，阿某君啱啱喺《真情》記者會講同我分咗手。吓﹗我噚晚仲同佢食飯好好哋，仲拍緊拖，仲未分手﹗點解會咁樣呢？我當然好想知道，即刻揸車去搵佢，但對方一定唔會講啦。嗰段時間，我好唔開心。當然，我後期知道乜嘢原因，但覺得唔需要再去追究。就係咁啦，係一個好好嘅經驗。嗰段時間我好難受，佢有佢嘅理由同原因。依家佢都成咗家，我都唔想再提呢件事。」
（即時娛樂）