Jace喺去年一口氣推出五首自己主力創作既作品，以音樂向樂迷宣布陳凱詠正式回歸。嚟到今年更搵嚟星級班底，炮製出震撼作《百妖夜行的修行》，令人眼前一亮。
「不要⼩看區區青蛇 請到魔怪妖精比邪 放下壓力撒野」
身處依個社會，周遭實在太多約束，寸步難行，疲憊不堪。依首作品正正提醒大家，其實人生都係求活得快樂舒服，又何必替自己上無形枷鎖。生活想點過就點過，最緊要能夠做自己。
“Show off what’s our best ignoring the worldly test”
所謂奇怪不過係世俗想法，大家說到底只係凡人一個，你點樣過其實唔影響世界運轉，因此無需介意別人目光，你亦無義務接受其他人批評。每個人都係獨立個體，生命既價值理應由自己創造。
只要有勇氣踏出第一步，懶理閒言閒語，輕鬆自由既生活就喺前面等待著你。
「怪咖也都平常⼈ 怪不怪不⽤悶⼈過問」
《百妖夜行的修行》歌詞唔長但頗複雜，要認真閱讀先明白當中哲理，加插幾種語言依然順耳押韻，而且符合歌曲意思，真係得夕爺先做到啲咁癲既事。
曲風融合不同元素，演繹帶點慵懶，相當特別又保留到Jace個人特色，成功將音樂玩到極致。第一次欣賞雖然有啲唔習慣，畢竟歌曲同其他廣東歌太唔同，但又會覺得新奇洗腦，越聽越上癮。
「莫問地位在野 活著就是玩嘢 復活在繁榮荒野 」
我喺《隔離》時期已經十分喜歡陳凱詠，各種風格既歌佢都駕馭到，首首啱我口味，一上到舞台仲有吸引眼球既魔力。
自從成為獨立歌手後，Jace喺創作上更自由，去年推出既專輯《HATCHING》嘗試各種風格，帶出滿滿驚喜，耳目一新。正如《百妖夜行的修行》歌詞所言，一心做自己喜歡既音樂，無需理會太多，開心就足夠。
「穿著什麼衣服 天衣無縫的舒服」
雖然Jace近年經歷咗唔少風浪，但以佢全面出色既才華，加上有趣玩味既真性情，相信好快會重新受到廣大樂迷喜愛，喺香港樂壇走出一條獨特音樂路。
話雖如此，個人非常希望陳凱詠會喺不久將來出返首pop少少既情歌，大愛《沒有無緣無故的恨》！！
《百妖夜行的修行》JACE 陳凱詠
作曲: JACE 陳凱詠
作詞: 林夕
編曲: hirsk/ 蔡德才@人山人海
監製: JACE陳凱詠/ 蔡德才@人山人海/ hirsk
「怪咖也都平常⼈
怪不怪不⽤悶⼈過問
到底那邊是異類
但特別利申 異類仍合襯
⾃由⾃在是抱負
為何事要辯護
妖怪也可是⼈⽗
未曾備受愛護 天⽣我材 必要⾃顧」
▼Follow hkpopculturelover
Instagram: https://www.instagram.com/hkpopculturelover/