【頭條獨家】撇甩愛女二人世界　李丞責夫婦逛街不忘買童裝

著名堪輿學家李丞責博士與太太劉倩婷（Sandy）結婚7年依舊恩愛，兩公婆經常出雙入對，就連早前做慈善向學校捐口罩，他們都夫妻檔拍住上。不過抗疫期間，二人亦好少到人多的地方行街，月初疫情未算嚴峻，李丞責就跟Sandy撇低愛女，兩度拍住拖殺落銅鑼灣買嘢，其間亦不忘為囡囡添新裝。採訪：梁志明早前傍晚6時許，李丞責夫婦現身利園Hermes，未知最近是否瘦咗呢？身穿粉紅色孖襟西裝褸襯Polo shirt的Sandy，將帶來的Shocking Pink皮帶交給店員釘窿；等待期間，她便企埋一邊低頭狂撳手機，而老公就在店內行。當日穿冷背心襯白恤衫、梳了個蛋撻頭的李丞責，驟眼睇好似學生哥，成功回春！釘完窿後，Sandy即刻將皮帶穿番上條腰，之後便雙雙返歸。爭取時間分頭行
另一日李氏夫婦再次現身利園，但今次兩公婆決定慳時間分開行，當Sandy去Ralph Lauren揀衫畀囡囡時，一向好杯中物的李丞責就走咗去酒窖，他一邊戴住個Ear pieces聽歌，一邊皺晒眉研究貨架上的靚酒，睇咗15分鐘便拎咗一支3000幾蚊的白酒去埋單。隨後，李丞責再到童裝店會合太太回家，沿途Sandy邊行邊從紙袋中取出一件白色褸仔拼上身Show畀老公睇，李丞責望一望都好滿意。