有女人嘅地方就有是非，爭仔爭上位乜都可以爭，過去圈中亦有唔少姊妹反目的例子。當中原因不乏爭上位、爆人私隱，不過最常見都係同男仔有關，難怪好多人都話女仔之間嘅友誼好脆弱啦！
撰文、圖片：東方新地
馮盈盈江嘉敏因船P事件姊妹擘面
馮盈盈與江嘉敏的三年姊妹情，因為一個富豪船P而徹底破裂，回復單身的馮盈盈被指冧何猷亨釣金龜，東窗事發後她極力否認拜金，聲稱是透過江嘉敏介紹才認識猷亨，推波事件一觸即發，江嘉敏唔認做媒，大爆眾人早已認識食過飯。馮盈盈想大事化小即封口，不過江嘉敏就幫倒忙搞大件事，早前在IG留言：「知人口面不知心」，矛頭直指馮盈盈。
Cookies四缺一因Miki「大口」爆Kary秘秘
有指楊愛瑾（Miki）在16年底傳出有喜消息的同時，漏出好姊妹吳雨霏於年初小產一事，令姊妹感情從此破裂，自17年起餅碎聚會便四缺一，而四年來 Kary的生日聚會，亦再冇預 Miki參與。
G.E.M硬搶JW富三代男友再無姊妹做
JW曾與富三代 Mark Ngai拍拖，有傳 G.E.M.硬搶 Mark，兩女更為爭仔而反目，姊妹情不再，之後 JW與 Mark分手，更公開認與 G.E.M.已甚少聯絡。
Janice Man與 Angelababy孖公仔為爭上位反目
當年 Janice Man與 Angelababy經常以孖公仔造型亮相，誇張到從頭到腳甚至大眼仔都係同款，仲孖住接咗好多廣告，又共同成立品牌「CHOICE」， 不 過隨住兩人走紅，好姊妹互相競爭，甚至互相爆料，導致兩人感情出現裂痕，連Angelababy和黃曉明舉辦世紀婚禮，Janice Man也沒有受邀。
陳瀅阻姊妹劉佩玥墮「媾女王」陷阱
劉佩玥與「巨聲幫」大孖周志文戀情愈燒愈熱，好姊妹陳瀅為怕劉佩玥墮「媾女王」陷阱，曾力勸她懸崖勒馬諗清楚，可惜忠言逆耳，對「媾女王」死心塌地的劉佩玥寧為愛情犧牲友誼，兩姊妹已極少聯絡，連朋友聚會亦有你冇我。
Super Girls表面和平暗裡爭仔
Super Girls五位成員表面好感情，實情爭寵爭 job傳聞不停，後來仲爭埋仔！話說 Heidi BB（李靜儀）同33歲有米監製 Gareth Chan（陳考威）撻著十個月，失驚無神被團員 Yanny（陳穎欣）介入，又著情侶鞋又偷約日本旅行，仲周圍放風向 Heidi示威，搞到姊妹徹底擘面。