落得場比賽，梗係想贏，但人生呢，往往不似預期。以下一班落選港姐們，有大熱倒灶、有三甲不入，咪一樣繼續喺娛樂圈發光發亮，正所謂條條大路通羅馬，一樣掂！
撰文、圖片：東方新地
37歲黃智雯：星馬雙料視后
參選2007年度港姐並入圍最後五強，後入讀TVB藝訓班，由低做起，初期多演唔多起眼嘅路人角色，隨著經驗累積，開始備受力捧。其實自2011年至今，黃智雯已經係各大頒獎禮嘅「提名王」；2012年更憑《缺宅男女》、《巴不得媽媽》、《On Call 36小時》 和 《飛虎》 贏得奪得 「飛躍進步女藝員」，其後逐步攀上女主角之位，喺近年多部劇集如《降魔的》及《三個女人一個 「因」 》中演技精湛，更被封為 「民選視后」 ，並於2018年獲得星馬雙料視后殊榮。
51歲張可頤：落選港姐入行一年即被力捧
張可頤在上世紀八十年代赴英留學，放暑假返港時，被名導徐克、金牌經理人鍾珍發掘而加入娛樂圈，二十歲出頭已拍攝電影《英雄本色3》和客串TVB處境喜劇《卡拉屋企》。1994年參選港姐，大熱門卻不敵當屆冠軍譚小環，落選三甲後簽約TVB，入行一年即被力捧，從此一帆風順，成為收視保證︰《難兄難弟》《九五至尊》、《金枝慾孽》等多不勝數，成為一代當家花旦。03年更憑《九五至尊》呂四娘一角，打敗強勁對手佘詩曼、宣萱、郭可盈及陳慧珊，勇奪「我最喜愛的女主角」。
33歲湯洛雯：六強止步無阻發展
2012年網上報名參加港姐，由於父親湯鎮宗、叔叔湯鎮業同為演員，話題性高，令湯洛雯成為熱門，可惜六強止步。但仍獲無綫簽約成為藝員，參演多齣電視劇包括《愛•回家》、《完美叛侶》、《燦爛的外母》與《翻生武林》等等。2019年發生「安心偷食事件」，湯洛雯獲欽點接 替黃心穎重拍《法證先鋒IV》，其後於《一笑渡凡間》躋身「女一」之列，更同無綫筍盤馬國明撻著，不時高調放閃，人氣旺盛！
37歲趙希洛：「無綫御用癲婆」演技得認同
與黃智雯同樣於2007年參選港姐入行，由於趙希洛多次扮演變態人物、殺人犯，因此被網友笑指為「無綫御用癲婆」。去年係呢個癲婆嘅轉捩點，趙於《金宵大廈》單元故事《嬰》中，扮演憶子成狂嘅「何太」，眼神凌厲，又經常手起刀落，場面血淋淋，因而奪得《萬千星輝》「最佳女配角」。雖然有米父母一直反對女兒加入娛樂圈，但趙希洛如今劇接劇，前途一片光明。
28歲林凱恩：憑《愛•回家》Bonnie彈起
15年為母親圓夢而參選港姐，林凱恩只獲得友誼小姐獎。近年憑《愛•回
家之開心速遞》中 Bonnie一角成功彈起，之後曝光率大增，獲派演多部劇集如《她她她的少女時代》及《降魔的》等，演技逐漸受肯定。
43歲林淑敏：經典「大小姐」受網民支持
曾患上第二期乳癌並已康復嘅林淑敏，參加2000年港姐競選而入行，2010年至2013年密集式演出多套劇集，擅於揣摩太太、媽媽角色，包括《衝呀！瘦薪兵團》默默支持丈夫度過難關嘅「陳愛蓮」、《幸福摩天輪》愛女心切嘅「文婉嫺」以及《 On Call 36小時 II》唔願捐肝畀親子嘅「周夜虹」等。不過講到代表作，就一定係《愛•回家之開心速遞》，當中扮演霸氣大小姐「龍力蓮」深入民心，更因此而獲《萬千星輝》「最佳女配角」。
33歲高海寧：封胸靠演技獲重用
2008年港姐競選，冠、亞、季張舒雅、陳倩揚和馬賽現已各有去向，只有入圍最後五強嘅高 Ling仍然活躍於 TVB。模特兒出身、擁有34D導彈身材，高 Ling經常喺社交平台大派福利，亦多次被安排於劇集和綜藝節目中拋胸露肉。不過近年備受器重，獲派演出多齣重頭劇，更擔正女一，收起豐滿身材，話畀大家知佢並唔係花瓶囉！
50歲郭可盈：「四大花旦」之一
上世紀九十年代，《刑事偵緝檔案》系列大受歡迎，女主角郭可盈扮演
嘅記者 Jessie，跟陶大宇組成熒幕情侶，真係百看不厭。其實郭可盈係1993年港姐出身，大熱門卻三甲不入，其後加入 TVB拍劇，兩年後爆紅。短短數年間劇接劇人氣逐步攀升，2001年與宣萱、蔡少芬、陳慧珊被封為「四大花旦」，奠定當家花旦之位。
28歲張寶兒：擔任「是非精」嶄露頭角
參選2016年港姐入行，加入 TVB後翌年，因與袁偉豪拍拖而為人認識。之後喺《學是學非》中擔任「是非精」嶄露頭角，令佢喺主持範疇上有更大發展，成為《姊妹淘》台柱司儀。呢兩年亦多咗演出機會，參與重頭劇《溏心風暴3》、《鐵探》等劇集演出。
33歲麥美恩：傻大姐個性殺出血路
見到麥美恩，就一定想起《學是學非》，皆因佢已成功成為節目 icon。參選2011年港姐入行時，曾被傳媒冠以「龍躉村姑」之名，不過 Mayanne並冇介懷，並以傻大姐性格殺出條血路，向主播、司儀之路發展，從主持《學是學非》、《娛樂頭條》到擔任《萬眾同心公益金》、《歡樂滿東華》與港姐司儀，其口才與轉數之快，有目共睹。
34歲劉思希：高材生「年輕版廖安麗」
參加得香港小姐，唔少人學歷都有番咁上下。生於澳門嘅劉思希，曾赴美國西北大學、林肯大學修讀行政管理和工商管理雙學士課程，去年邊拍劇邊修讀科大全球排名第一嘅 EMBA課程，絕對係圈中高學歷港姐代表！2011年以「年輕版廖安麗」稱號參選港姐，雖然三甲不入，但仍不乏演出機會，《愛·回家之開心速遞》嘅洋洋、《巨輪 II》嘅琳琳，仲有去年喺《丫鬟大聯盟》中，佢唔理形象豁出去，扮演放蕩千金，成為話題之作！
31歲簡淑兒：甜美笑容成宅男女神
身高167cm ，參加2012年度港姐時，拍埋冠、亞、季軍張名雅、黃心穎、朱千雪身邊，簡淑兒真係好蝕。曾是女子音樂組合「少女標本」成員之一，2015年起步拍劇，喺處境劇《愛·回家之八時入席》裡飾演「袁冰冰」，憑一副鄰家女孩形象，又經常甜笑而成為一代宅男女神。
30歲陳婉衡：主持旅遊節目獲關注
曾參選2011年溫哥華華裔小姐，翌年回港參加港姐，之後於 TVB娛樂新聞台任職主播，擁有36E好身材嘅陳婉衡獲封「無綫咪神」。由於熱愛瑜伽、鋼管舞，又考獲健身教練牌照，好動性格獲派主持多個旅遊節目如《 3日2夜》、《 Go! Yama Girl》等，陳婉衡更在節目中大方展現震撼上圍和「蜜桃臀」。
